मुरबाड, ता. २४ (वार्ताहर) : तालुक्यातील दानशूर व्यक्तिमत्त्व म्हणून ओळख असलेले ज्ञानेश्वर मुरबाडे यांनी सरळगावजवळील बांदलपाडा येथील शाळेतील विद्यार्थी-विद्यार्थिनींना छत्र्यांचे वितरण केले. पावसाळ्याच्या सुरुवातीलाच विद्यार्थ्यांना आवश्यक साहित्य उपलब्ध करून देण्याच्या उद्देशाने हा उपक्रम राबविण्यात आला. छत्र्यांचे वाटप होताच विद्यार्थ्यांच्या चेहऱ्यावर आनंदाचे भाव उमटले. ग्रामीण व आदिवासी भागातील विद्यार्थ्यांना शाळेत ये-जा करताना पावसाचा त्रास होऊ नये, यासाठी मुरबाडे यांनी हा उपक्रम हाती घेतल्याचे उपस्थितांनी सांगितले. याप्रसंगी शिक्षक, ग्रामस्थ, पालक उपस्थित होते.