वपुंच्या स्मृतिदिनी विशेष कार्यक्रम
मुंबई, ता. २४ : प्रसिद्ध साहित्यिक आणि कथाकथनकार वसंत पुरुषोत्तम काळे अर्थात ‘वपु’ यांच्या पुण्यतिथीनिमित्त एका विशेष कार्यक्रमाचे आयोजन करण्यात आले आहे. त्यांच्या कन्या आणि प्रसिद्ध लेखिका स्वाती चांदोरकर यांच्या संकल्पनेतून वपु काळे यांच्या २५व्या स्मृतिदिनानिमित्त ‘११ वपुर्झा’ हा कार्यक्रम होत आहे.
आपल्या असंख्य पुस्तकांच्या माध्यमातून वपु आजही मराठी वाचकांच्या घराघरात आहेत. मराठी भाषेत कथाकथन या प्रकाराला त्यांनी एका वेगळ्या उंचीवर नेऊन ठेवले. लेखनासोबतच वपु चित्रकार होते, उत्तम फोटोग्राफर आणि कलेवर प्रेम असणारे आर्किटेक्ट अशी कितीतरी रूपे या कार्यक्रमातून रसिकांसमोर येणार आहेत.
प्रसिद्ध अभिनेते - निर्माते सुनील बर्वे आणि अभिनेते शशांक केतकर यांच्यासमवेत स्वाती चांदोरकर या विशेष अभिवाचनाच्या कार्यक्रमात सहभागी होणार आहेत. शनिवार, २७ जूनला सायंकाळी ७.३० वाजता दादरच्या स्वातंत्र्यवीर सावरकर राष्ट्रीय स्मारकात हा कार्यक्रम पार पडेल. हा कार्यक्रम विनामूल्य असणार आहे. वपूंवर प्रेम करणाऱ्या वाचकांनी आणि रसिकांनी जास्तीत जास्त संख्येने या कार्यक्रमास उपस्थित राहावे, असे आवाहन संयोजनकांतर्फे करण्यात आले आहे.
--------------------