जेएनपीए सेवा मार्गावर जीवघेणे खड्डे
उरण, ता. २३ (बातमीदार) ः जेएनपीए कोस्टल रोडला जोडणाऱ्या सेवा मार्गावर (सर्व्हिस रोड) जड कंटेनर वाहतुकीमुळे मोठमोठे आणि जीवघेणे खड्डे पडले आहेत. या वाढत्या खड्ड्यांमुळे कधीही एखादा भीषण अपघात होऊन वाहनचालकाचा जीव जाण्याची दाट शक्यता निर्माण झाली आहे.
जेएनपीए महामार्गावरून देशातील सर्वोच्च आयात-निर्यातीसाठी अहोरात्र अवजड कंटेनर्सची वाहतूक होत असते. कोस्टल रोडमार्गे जेएनपीए बंदराकडे जाणारी आणि बंदरातून बाहेर पडून विविध सीएफएस व गोदामांकडे जाणारी शेकडो वाहने याच सेवा मार्गाचा वापर करतात. सध्या सुरू असलेल्या मुसळधार पावसामुळे या सेवा मार्गावरील खड्ड्यांमध्ये मोठ्या प्रमाणावर पाणी साचले आहे. यामुळे वाहनचालकांना खड्ड्यांच्या खोलीचा आणि आकाराचा कोणताही अंदाज येत नाही. यामुळे एखादी मोठी दुर्घटना घडण्याची शक्यता व्यक्त करण्यात येत आहे. त्यामुळे प्रशासनाने कोणतीही मोठी दुर्घटना घडण्याची वाट न पाहता, या सेवा मार्गावरील खड्डे त्वरित बुजवावेत, अशी मागणी आता जोर धरू लागली आहे.