तुकाराम मुंढेंना शिवीगाळ; व्हिडिओ बनवणाऱ्याला अटक
​कल्याण, ता. २४ (बातमीदार) : अन्न व औषध प्रशासन विभागाच्या गुटखाविरोधी मोहिमेचा फटका बसल्याने दुर्गाप्रसाद पांडे या ओलाचालकाने थेट आयुक्त तुकाराम मुंढे यांच्यावरच समाजमाध्यमावर आगपाखड केली. आक्षेपार्ह व्हिडिओ बनवून तो व्हायरल केल्याप्रकरणी पांडेला खडकपाडा पोलिसांनी अटक केली आहे. दुर्गाप्रसादच्या वडिलांची पानटपरी होती. मात्र, एफडीएच्या कारवाईमुळे ती बंद झाली होती. गेल्या काही दिवसांपासून परिसरात गुटखा उपलब्ध होत नसल्याने दुर्गाप्रसाद नाराज होता. गुटखा मिळत नसल्याच्या रागातून त्याने थेट आयुक्त तुकाराम मुंढे यांना लक्ष्य केले. त्याने समाजमाध्यमावर एक व्हिडिओ बनवून त्यात आयुक्तांचा उल्लेख करत आक्षेपार्ह शिवीगाळ केली.