धोकादायक गॅलरी काढताना भिंत कोसळली
ठाणे, ता. २४ : नौपाडा परिसरातील ३० वर्षे जुन्या अरिहंत टॉवर इमारतीच्या धोकादायक गॅलरीचा भाग काढण्याचे काम सुरू असताना, अचानक गॅलरीची भिंत खालील मजल्यावरील गॅलरीत कोसळल्याची घटना बुधवारी घडली. यात गॅलरीच्या छतावरील पत्र्यांचे नुकसान झाले. मात्र, कोणतीही दुखापत झाली नाही. आपत्ती व्यवस्थापन कक्षाकडून मिळालेल्या माहितीनुसार, अरिहंत टॉवर इमारतीच्या पाचव्या मजल्यावरील सदनिकेतील धोकादायक गॅलरी काढण्याचे काम सोसायटीमार्फत सुरू होते. या वेळी गॅलरीची भिंत कोसळून चौथ्या मजल्यावरील गॅलरीत पडली. त्यामुळे गॅलरीच्या छतावरील पत्रे तुटून नुकसान झाले. या घटनेची माहिती मिळताच आपत्ती व्यवस्थापन विभाग, अग्निशमन दल, बांधकाम विभाग आणि अतिक्रमण विभागाचे अधिकारी घटनास्थळी दाखल झाले. संबंधित यंत्रणांनी तातडीने धोकादायक भाग हटवून परिसर सुरक्षित केला.