सकाळ वृत्तसेवा
नवी मुंबई, ता. २८ : खासगी शाळांचे वर्षागणिक वाढणारे अवाढव्य शुल्क आणि डोनेशनच्या त्रासाला कंटाळलेल्या पालकांसाठी नवी मुंबई महापालिकेच्या शाळा आता विश्वासार्ह पर्याय ठरत आहेत. महापालिकेने शिक्षण क्षेत्रात राबवलेल्या ‘स्मार्ट’ उपक्रमांमुळे आणि आधुनिक शिक्षण पद्धतीमुळे पटसंख्येने नवीन उच्चांक गाठला आहे. काही वर्षांपूर्वी २६ हजार ते ३५ हजार विद्यार्थी महापालिका शाळांमध्ये शिक्षण घेत होते. आता ही संख्या सुमारे ४० ते ४५ टक्क्यांनी लक्षणीय वाढत पटसंख्या ५० हजारांवर पोहोचली आहे.

पालिकेच्या ५७ प्राथमिक आणि २३ माध्यमिक अशा एकूण ८० शाळांमध्ये विद्यार्थ्यांना आधुनिक युगाशी जोडणारे शिक्षण दिले जात आहे. दरवर्षी खासगी शाळांच्या शैक्षणिक शुल्कात होणारी वाढ मध्यमवर्गीय आणि सर्वसामान्य पालकांच्या आवाक्याबाहेर जात आहे. या पार्श्वभूमीवर पालिका शाळांमधील सुधारलेला शैक्षणिक दर्जा, सुसज्ज इमारती आणि प्रशिक्षित शिक्षकांमुळे पालकांचा दृष्टिकोन बदलला आहे. परिणामी, गेल्या काही शैक्षणिक वर्षांत शेकडो विद्यार्थ्यांनी खासगी शाळा सोडून पालिका शाळांमध्ये प्रवेश घेतल्याचे चित्र पाहायला मिळत आहे.

विशेष प्रयोगशाळेमुळे शिक्षण रंजक
नवी मुंबई महापालिकेच्या शाळा आता केवळ पुस्तकी ज्ञानापुरत्या मर्यादित राहिल्या नसून विद्यार्थ्यांना आधुनिक युगाशी जोडणारे शिक्षण दिले जात आहे. प्रत्येक वर्गात संवादात्मक स्मार्ट बोर्ड आणि डिजिटल साहित्याद्वारे रंजक पद्धतीने अध्यापन केले जात आहे. विज्ञान, तंत्रज्ञान, अभियांत्रिकी आणि गणित या विषयांची प्रात्यक्षिकांसह माहिती देण्यासाठी विशेष प्रयोगशाळा उभारण्यात आल्या आहेत.

दुर्बल घटकांतील विद्यार्थ्यांना दिलासा
पालकांची वाढती मागणी लक्षात घेऊन सुरू करण्यात आलेल्या सेमी-इंग्रजी आणि इंग्रजी माध्यमाच्या वर्गांना अभूतपूर्व प्रतिसाद मिळत आहे. मोफत पाठ्यपुस्तके, गणवेश, बस प्रवास सवलत आणि शैक्षणिक साहित्यामुळे आर्थिकदृष्ट्या दुर्बल घटकांतील विद्यार्थ्यांना मोठा दिलासा मिळाला आहे.