साचलेल्या पाण्यातून प्रवासाची वेळ
वाघाडी ते कांदरवाडी रस्त्यावरील खड्ड्यांमुळे मनस्ताप
कासा, ता.३१(बातमीदार)ः वाघाडी ते कांदरवाडी गावाला जोडणाऱ्या मुख्य रस्त्याची दोन वर्षांपासून दुरवस्था आहे. अशातच पावसाळ्यात खड्ड्यांमधील साचलेल्या पाण्याने प्रवास अधिकच बिकट झाला आहे.
वाघाडी ते कांदरवाडी गावाकडे जाणाऱ्या रस्त्याखालील सिमेंटचा पाईप तुटल्याने नागरिकांना अर्ध्या रस्त्यातून मार्ग काढावा लागत आहे. या प्रकाराने मार्गावरील वाहतूक कायमची बंद होण्याची भीती आहे. खराब रस्त्यामुळे शाळकरी विद्यार्थी, महिला, वृद्ध तसेच बाजारपेठ व शासकीय कार्यालयात जाणाऱ्या नागरिकांना मोठ्या त्रासाला सामोरे जावे लागत आहे. तसेच प्रवासी वाहतूक करणाऱ्या वाहनांनाही फटका बसत आहे. हा परिसर जंगलाने व्यापलेला असल्याने सर्पदंश किंवा अन्य आपत्कालीन परिस्थितीत रुग्णालयात वेळेत पोहोचणे कठीण होत आहे. तसेच रस्त्याच्या खराब अवस्थेमुळे काही गर्भवती महिलांना विविध अडचणींचा सामना करावा लागत आहे.
---------------------
रास्तारोकोचा इशारा
कांदरवाडी येथील समाज मंदिरात प्रशासकीय अधिकारी, बांधकाम विभाग, लोकप्रतिनिधींना निवेदन देण्याचे ठरवण्यात आले. त्यानंतर दहा दिवसांत रस्त्याची दुरुस्ती झाली नाहीतर ९ सप्टेंबर रोजी रास्ता रोको अथवा भात रोपणी आंदोलनाचा निर्णय ग्रामस्थांनी घेतला आहे.
--------------------
सणासुदीचे दिवस सुरू होण्यापूर्वी प्रशासनाने रस्त्याची दुरुस्ती करावी. अन्यथा आंदोलनाशिवाय पर्याय नाही.
- अॅड. विराज गडग, समाजसेवक