उल्हासनगर, ता. २ (वार्ताहर) : सात महिन्यांची प्रतीक्षा, पक्षांतर्गत रस्सीखेच आणि बदललेल्या राजकीय समीकरणांनंतर उल्हासनगर महापालिकेतील सात स्वीकृत सदस्यांच्या नियुक्तीला अखेर मुहूर्त मिळाला आहे. ११ सप्टेंबरच्या विशेष महासभेत सात नावांवर शिक्कामोर्तब होणार असून, महापौर शिवसेनेचा असला तरी संख्याबळाच्या नव्या गणितात भाजपला चार, तर शिवसेनेला तीन जागा मिळणार आहेत.

जानेवारीतील महापालिका निवडणुकीनंतर भाजप आणि शिवसेनेने एकत्र सत्ता स्थापन केली. ज्यात ७८ पैकी ७७ नगरसेवक सत्ताधारी गटात आले, मात्र स्वीकृत सदस्य पदासाठी दोन्ही पक्षांत इच्छुकांची भाऊगर्दी, अंतर्गत रस्सीखेच आणि राजकीय कुरघोड्यांमुळे नियुक्ती रखडली होती. सुरुवातीच्या संख्याबळानुसार शिवसेनेला चार जागा मिळण्याची शक्यता व्यक्त केली जात होती. मात्र, शिवसेनेच्या दोन नगरसेवकांच्या अपात्रतेनंतर संपूर्ण गणितच बदलले आहे. 

३७ नगरसेवक असलेला भाजप आता महापालिकेतील सर्वाधिक संख्याबळाचा गट ठरल्याने सातपैकी चार जागांवर भाजप, तर तीन जागांवर शिवसेनेचे सदस्य नियुक्त होणार आहेत. महापौरपद शिवसेनेकडे असले तरी स्वीकृत सदस्यांच्या नियुक्तीत भाजपचे पारडे जड झाल्याने राजकीय वर्तुळात चर्चांना उधाण आले आहे. विशेषतः निवडणुकीत पराभूत झालेल्या ज्येष्ठांना पुन्हा सभागृहात संधी मिळणार की पक्षनिष्ठ नव्या चेहऱ्यांची वर्णी लागणार, याबाबत उत्सुकता शिगेला पोहोचली आहे.

अर्ज ७ सप्टेंबरला सादर करावे लागणार 
सात स्वीकृत सदस्यांच्या नियुक्तीसाठी सात महिन्यांपासून सुरू असलेली राजकीय प्रतीक्षा अखेर संपण्याच्या मार्गावर आहे. ११ सप्टेंबरला विशेष महासभेत या सात सदस्यांच्या नियुक्तीवर शिक्कामोर्तब होणार आहे. इच्छुक उमेदवारांना ७ सप्टेंबरला दुपारी १२ ते २ या वेळेत अर्ज सादर करावे लागणार आहेत.