भाजीपाल्याच्या भावात घसरण
आवक वाढल्याने बहुतांश भाज्या २० ते ४० रुपये किलो

वाशी, ता. ३ (बातमीदार) ः श्रावण महिन्यात भाजीपाल्याची मागणी वाढलेली असतानाच वाशीतील घाऊक भाजीपाला बाजारात आवक वाढल्याने भावात मोठी घसरण झाली आहे. सध्या घाऊक बाजारात बहुतांश भाज्या २० ते ४० रुपये किलो भावाने उपलब्ध आहेत. घाऊक बाजारातील या घसरणीचा परिणाम किरकोळ बाजारावरही झाला असून, सध्या बहुतेक भाज्या ६० ते ८० रुपये किलो भावाने मिळत आहेत. यामुळे वाढत्या महागाईच्या काळात सर्वसामान्य ग्राहकांना, विशेषतः गृहिणींना मोठा दिलासा मिळाला आहे.
गेल्या काही दिवसांपासून राज्यातील विविध भागांतून वाशी बाजारात भाजीपाल्याची आवक वाढली आहे. पालेभाज्या, फळभाज्या आणि शेंगभाज्यांचा पुरवठा चांगला असल्याने मागणीच्या तुलनेत उपलब्धता अधिक आहे. परिणामी, श्रावणातील वाढत्या मागणीनंतरही भाव वाढण्याऐवजी कमी झाले आहेत.
सध्या घाऊक बाजारात लाल भोपळा आणि कोबी ६ ते १० रुपये किलो भावाने विकले जात आहेत. फ्लॉवर आणि दुधी भोपळा १२ ते १८ रुपये, पडवळ १६ ते २० रुपये, तर चवळी शेंग, ढेमसे, काकडी, ढोबळी मिरची, शिराळी आणि दोडकी २० ते ३० रुपये किलो भावात आहेत. फरसबी, घेवडा आणि गवार ३० ते ४० रुपये किलोवर आले आहेत. भेंडी २४ ते ३० रुपये, वांगी २० ते ३० रुपये, तर सुरण २४ ते २८ रुपये किलो भावाने उपलब्ध आहे.

टोमॅटो व मटारचे भावही नियंत्रणात
टोमॅटोचे भावही यंदा पावसाळ्यात नियंत्रणात आहेत. टोमॅटो १६ ते २० रुपये किलो भावात मिळत असून, गावठी आणि बंगळुरू टोमॅटोची आवक चांगली आहे. हिरवी मिरचीही ३० ते ४० रुपये किलोवर आली आहे. मागील महिन्यात १५० ते २०० रुपये किलो असलेला हिरवा मटार आता घाऊक बाजारात ६० ते ७० रुपये, तर किरकोळ बाजारात ८० ते १०० रुपये किलो भावात मिळत आहे.