महासभेत ‘कॅंडी क्रश’
चर्चेदरम्यान नगरसेविका गेम खेळताना कॅमेऱ्यात कैद

भिवंडी, ता. ३ (वार्ताहर) : भिवंडी महापालिकेच्या महासभेत शहरातील गंभीर प्रश्नांवर चर्चा सुरू असताना एक बुरखाधारी महिला नगरसेविका मोबाईलवर ‘कॅंडी क्रश’ गेम खेळताना कॅमेऱ्यात कैद झाल्या. हा प्रकार गुरुवारी (ता. ३) समोर आला.
महापालिकेच्या सभागृहात गुरुवारी दुपारी महासभा सुरू होती. शहराचे उत्पन्नाचे स्रोत वाढविण्यासह कोहिनूर इमारत दुर्घटनेबाबत स्थगन प्रस्तावाच्या माध्यमातून चर्चा सुरू होती. या दुर्घटनेत १० जणांचा मृत्यू झाल्याने पीडितांना मदत मिळवून देण्यासह शहरातील विविध मूलभूत प्रश्नांवर सभागृहात चर्चा अपेक्षित होती. मात्र याच वेळी एक बुरखाधारी महिला नगरसेविका मोबाईलवर ‘कॅंडी क्रश’ गेम खेळत असल्याचे दृश्य कॅमेऱ्यात कैद झाले.
संबंधित नगरसेविकेने बुरखा परिधान केला असल्याने त्या नेमक्या कोण आहेत, हे स्पष्ट झालेले नाही. मात्र महासभेसारख्या महत्त्वाच्या बैठकीत गंभीर विषयावर चर्चा सुरू असताना मोबाईलवर गेम खेळण्याचा प्रकार समोर आल्याने नागरिकांकडून तीव्र नाराजी व्यक्त होत आहे.
कोणार्क विकास आघाडीचे गटनेते तथा माजी महापौर विलास पाटील यांनी या प्रकाराबाबत नाराजी व्यक्त केली. कोहिनूर इमारत दुर्घटनेत १० जणांचा मृत्यू झाला आहे. अशा परिस्थितीत पीडितांना कशी मदत देता येईल, यावर चर्चा होणे अपेक्षित आहे. मात्र महासभेत नगरसेविकेकडून मोबाईलवर गेम खेळला जाणे ही अत्यंत गंभीर बाब आहे. भविष्यात कोणत्याही नगरसेवकाने महासभेत अशा प्रकारचे वर्तन करू नये, अशी प्रतिक्रिया पाटील यांनी व्यक्त केली.