खासगी शिकवणी केंद्रांच्या प्रारुपावर ११,४१० हरकती
मुंबई, ता. ७ : महाराष्ट्र खासगी शिकवणी केंद्र (नोंदणी व विनियमन) अधिनियम २०२६ चे प्रारूप राज्य शासनाकडून तयार करण्यात आले असून, त्यावर नागरिकांकडून सूचना व हरकती मागविण्यात आल्या आहेत. या प्रारुपाची मराठी व इंग्रजी प्रत शालेय शिक्षण व क्रीडा विभागाच्या अधिकृत संकेतस्थळावर प्रसिद्ध करण्यात आली आहे. प्रारूप अधिनियम अंतिम करण्यापूर्वी नागरिकांना आपल्या सूचना व हरकती लेखी स्वरूपात सादर करण्याचे आवाहन करण्यात आले होते. यासाठी आयुक्त शिक्षण, महाराष्ट्र राज्य, मध्यवर्ती इमारत, पुणे तसेच शिक्षण संचालक (माध्यमिक व उच्च माध्यमिक), महाराष्ट्र राज्य, पुणे या कार्यालयांकडे सूचना व हरकती सादर करण्याची व्यवस्था करण्यात आली होती. पूर्वी सूचना व हरकती सादर करण्यासाठी ४ सप्टेंबर २०२६ला सायंकाळी ६ वाजेपर्यंत मुदत देण्यात आली होती; मात्र या कालावधीत मोठ्या प्रमाणावर नागरिकांनी प्रतिसाद दिला आहे. ७ सप्टेंबर २०२६ पर्यंत तब्बल ११ हजार ४१० सूचना व हरकती प्राप्त झाल्या आहेत. नागरिकांचा वाढता प्रतिसाद लक्षात घेऊन शासनाने सूचना व हरकती सादर करण्यासाठीची मुदत वाढविली आहे. आता इच्छुक नागरिकांना १५ सप्टेंबर २०२६ पर्यंत आपली मते, सूचना व हरकती मांडता येणार आहेत. प्राप्त झालेल्या सर्व सूचना व हरकतींचा विचार करून महाराष्ट्र खासगी शिकवणी केंद्र (नोंदणी व विनियमन) अधिनियम २०२६चे प्रारूप अंतिम करण्यात येणार आहे.