सकाळ वृत्तसेवा
ठाणे, ता. ८ ः ठाणे-मुलुंड रेल्वे स्थानकादरम्यान नौपाड्यातील बांदल चाळीत ५० वर्षांपासून राहणाऱ्या १४९ कुटुंबांना ठाणे महापालिकेकडून घर मिळणार आहे. या चाळीतील रहिवाशांच्या बायोमेट्रिक सर्वेक्षणाला आयुक्त सौरभ राव यांनी मान्यता दिली आहे.

नियोजित नवे ठाणे रेल्वे स्थानकाच्या जागेजवळ रेल्वे मार्गालगत बांदल चाळ वसली आहे. या घरात कुटुंबांच्या चार ते पाच पिढ्या झाल्या. नव्या रेल्वे स्थानकाच्या बांधकामामुळे १४९ घरे तोडण्यासाठी मध्य रेल्वे प्रशासनाच्या मालमत्ता विभागाने संबंधित कुटुंबांना नोटिसा बजाविल्या होत्या. त्यामुळे रहिवासी हवालदिल झाले होते. नवीन रेल्वे स्थानक प्रकल्पामध्ये रेल्वेबरोबरच ठाणे महापालिका सहभागी झाली आहे. महापालिकेने नव्या स्थानकासाठी जोड रस्ते व पायाभूत सुविधांची जबाबदारी घेतली आहे. त्यामुळे या कुटुंबांचे महापालिकेने घर देऊन पुनर्वसन करावे, अशी मागणी संजय वाघुले यांनी केली होती. त्याबाबत खासदार नरेश म्हस्के यांच्यासह संजय वाघुले यांनी नुकतीच आयुक्त राव यांची भेट घेतली होती. त्या वेळी संबंधित कुटुंबांना घर देण्याची मागणी केली होती. त्यानंतर बांदल चाळीतील कुटुंबांचे बायोमेट्रिक सर्वेक्षण करण्यास मान्यता देण्यात आली होती. वाघुले यांनी सोमवारी (ता. ७) बांदल चाळीला भेट दिली. या वेळी महापालिकेचे कार्यकारी अभियंता धनाजी मोदे, कनिष्ठ अभियंता अमेय चव्हाण यांचीही उपस्थिती होती.