वज्रेश्वरी, ता. ८ (बातमीदार) : सततचा पाऊस, रिमझिम सरी, दमट वातावरण आणि त्यानंतर कोरडे हवामान यामुळे भिवंडी ग्रामीण परिसरात आरोग्याचा प्रश्न गंभीर बनला आहे. अनेक ठिकाणी पावसाचे पाणी साचल्याने त्यात शेवाळ आणि घाण जमा झाली आहे. अंबाडी नाका, झिडके, वज्रेश्वरी यांसह विविध भागांत चिखल आणि अस्वच्छतेचे साम्राज्य निर्माण झाले असून डास, माशा; तसेच इतर कीटकांचा प्रादुर्भाव वाढला आहे. परिणामी, नागरिकांच्या आरोग्यावर परिणाम होत असून साथीच्या आजारांचा धोका वाढला आहे.

साचलेल्या पाण्यामुळे डेंगी, मलेरिया, टायफाईड, सर्दी, ताप, खोकला, हिवताप आणि अंगदुखी यांसारख्या आजारांनी नागरिक त्रस्त असल्याचे चित्र आहे. त्यामुळे सरकारी आणि खासगी रुग्णालयांमध्ये उपचारासाठी येणाऱ्या रुग्णांची संख्या वाढली आहे. दरम्यान, नागरिकांनी परिसर स्वच्छ ठेवावा, घराच्या आसपास पाणी साचू देऊ नये आणि डासांची पैदास होणार नाही याची काळजी घ्यावी, असे आवाहन आरोग्य विभागाकडून करण्यात येत आहे. डॉक्टरांनी नागरिकांना पाणी उकळून पिणे, ताजे व स्वच्छ अन्न सेवन करणे; तसेच ताप किंवा अन्य लक्षणे आढळल्यास तातडीने वैद्यकीय सल्ला घेण्याचे आवाहन केले आहे.

प्रतिबंधात्मक उपाययोजनांची मागणी
साथीचे आजार रोखण्यासाठी डास प्रतिबंधक औषध फवारणी, धूर फवारणी आणि स्वच्छता मोहिमेला अधिक गती देण्याची मागणी नागरिकांकडून होत आहे. वेळेत प्रतिबंधात्मक उपाययोजना केल्यास आजारांचा वाढता धोका कमी होण्यास मदत होईल, अशी अपेक्षाही नागरिकांनी व्यक्त केली आहे.