भिवंडी, ता. ९ (वार्ताहर) : शहरातील काप आळी परिसरात बंद घराचे कुलूप तोडून चोरट्यांनी २३.५ तोळे सोन्याचे दागिने, ५०० ग्रॅम चांदी आणि एक लाख २० हजार रुपयांची रोकड असा लाखोंचा ऐवज लंपास केला. शनिवारी घडलेल्या या घटनेप्रकरणी भिवंडी शहर पोलिस ठाण्यात चोरट्याविरोधात गुन्हा दाखल करण्यात आला आहे. मात्र, पोलिसांनी गुन्ह्यात केवळ दहा तोळे सोन्याची चोरी नोंदविल्याचा आरोप केसरवाणी कुटुंबीयांनी केला आहे.
धर्मेंद्र लालचंद केसरवाणी हे पत्नी व मुलांसह घराला कुलूप लावून घुंगटनगर येथे गेले होते. मध्यरात्री एक वाजता घरी परतल्यानंतर त्यांना दरवाजाचे कुलूप तुटलेले दिसले. घरातील लोखंडी कपाटाचे लॉकर फोडून त्यातील मंगळसूत्र, अंगठ्या, हार, बांगड्या, झुमके तसेच चांदीच्या पैंजण आणि रोकड चोरीला गेल्याचे निदर्शनास आले. चोरीनंतर दागिन्यांची बॅग खांद्यावर घेऊन जाणारा चोरटा रस्त्यावरील सीसीटीव्ही कॅमेऱ्यात कैद झाला आहे. घटनास्थळापासून सुमारे एक किलोमीटर अंतरावर चोरीचा मुद्देमाल नेण्यासाठी वापरलेली बॅगही पोलिसांना सापडली. मात्र, चोरटा अद्याप फरार आहे.
दरम्यान, घरातून २३.५ तोळे सोने चोरीला गेले असून त्याची अधिकृत बिले आपल्याकडे असल्याचे केसरवाणी कुटुंबीयांनी सांगितले. पोलिसांनी चोरीच्या सोन्याची पूर्ण नोंद करावी आणि चोरट्याला तातडीने अटक करून मुद्देमाल परत मिळवून द्यावा, अशी मागणी त्यांनी केली आहे. या घटनेमुळे परिसरात खळबळ उडाली असून पोलिस गस्त वाढविण्याची मागणी नागरिकांनी केली आहे.