सकाळ वृत्तसेवा
ठाणे, ता. ११ : गणेशोत्सवासाठी कोकणातील मूळ गावी जाण्याची लगबग सुरू झाली असताना बंद घरांच्या सुरक्षेचा प्रश्नही ऐरणीवर आला आहे. गणपती उत्सवाच्या काळात अनेक गणेशभक्त कुटुंबासह काही दिवसांसाठी गावी जाणार असल्याने अनेक घरे बंद राहण्याची शक्यता आहे. या पार्श्वभूमीवर घरफोडी आणि चोरीच्या घटना टाळण्यासाठी मुंब्रा पोलिसांनी नागरिकांना विशेष खबरदारी घेण्याचे आवाहन केले आहे.

दिव्यातील नागरिकांनी गावी जाण्यापूर्वी घरात सोन्याचे दागिने, मोठी रोकड किंवा अन्य मौल्यवान वस्तू ठेवू नयेत. शक्य असल्यास दागिने व महत्त्वाच्या वस्तू सुरक्षित ठिकाणी किंवा बँकेच्या लॉकरमध्ये ठेवाव्यात, असे पोलिसांनी सांगितले आहे. घर बंद करताना मुख्य दरवाजासह खिडक्या, बाल्कनी आणि इतर प्रवेशद्वारे व्यवस्थित बंद करून कुलूप लावण्याची सूचना करण्यात आली आहे.

‘गावी गेलोय’ समाजमाध्यमांवर सांगू नका!
बाहेरगावी जाण्याची माहिती समाजमाध्यमांवर टाकणे टाळावे. घरातील व्यक्ती काही दिवसांसाठी बाहेर असल्याची माहिती सार्वजनिक झाल्यास त्याचा गैरफायदा चोरटे घेऊ शकतात. त्यामुळे प्रवासाचे फोटो किंवा घर बंद असल्याचे संकेत देणाऱ्या पोस्ट सोशल मीडियावर शेअर करू नयेत. घराची चावी किंवा घराशी संबंधित संवेदनशील माहिती अनोळखी व्यक्तीला देऊ नये. परिसरात संशयास्पद व्यक्ती, वाहन किंवा हालचाल आढळल्यास नागरिकांनी तातडीने पोलिसांना माहिती द्यावी, असेही आवाहन मुंब्रा पोलिस ठाण्याचे वरिष्ठ निरीक्षक गणेश जवादवाड यांनी केले आहे.