सकाळ वृत्तसेवा
ठाणे, ता. १५ : जुन्या जांभळी नाका ते पेढ्या मारुती मंदिर ते खाडी मार्गापर्यंतच्या ४० वर्षांच्या पर्जन्यवाहिनीच्या कामाला लवकरच सुरुवात होणार आहे. नगरसेविका नम्रता जयेंद्र कोळी यांच्या महासभेतील आक्रमक पवित्र्यानंतर संबंधित नाल्याच्या कामाला लवकरच सुरुवात होणार असल्याचे महापालिका प्रशासनाकडून जाहीर करण्यात आले.

जांभळी नाका ते पेढ्या मारुती मंदिर ते क्रिक रोडपर्यंत बंदिस्त नाल्यामधील गाळ काढण्याचा ठराव सभागृहात शुक्रवारी (ता. ११) मंजुरीसाठी आला होता. त्या वेळी या नाल्यामुळे जांभळी नाका परिसर अनेक वर्षांपासून पुराच्या विळख्यात सापडला असल्याकडे कोळी यांनी लक्ष वेधले. या नाल्याची पुनर्बांधणी करण्यासाठी नऊ वर्षांपासून पाठपुरावा करीत असूनही दखल घेतली जात नसल्याबद्दल संताप व्यक्त केला. एकेकाळी तब्बल १० फूट खोल असलेली जांभळी नाका ते पेढ्या मारुती मंदिर ते क्रिक रोडपर्यंतची पर्जन्यवाहिनी जांभळी नाक्याजवळ अवघी दीड फुटांवर आली आहे.

मासुंदा तलाव तुडुंब भरल्यानंतर पाण्याचा लोंढा जांभळी नाक्यावर आल्यामुळे पूरपरिस्थिती निर्माण होते, याकडे त्यांनी लक्ष वेधले. या भागात होलसेल बाजारपेठ व अनेक दुकाने असून, पावसाळ्यात नेहमी साचलेल्या पाण्यामुळे कोट्यवधींचे नुकसान होते. त्यामुळे नव्याने पर्जन्यवाहिन्या उभारण्याचे श्रेय कोणाला घ्यायचे असेल, त्याने घ्यावे, पण जांभळी नाका ते पेढ्या मारुती मंदिर ते क्रिक रोडपर्यंतच्या बंदिस्त नाल्याचे काम नव्याने करावे, अशी मागणी त्यांनी केली.