भिवंडी महामार्गावर ट्रकसह एक कोटीचा गुटखा जप्त
भिवंडी, ता. २ (वार्ताहर) ः मुंबईकडे जाणाऱ्या ट्रकवर ठाणे ग्रामीणच्या स्थानिक गुन्हे शाखेने कारवाई करीत ट्रकसह एक कोटी रुपयांचा गुटखा जप्त केला. मध्य प्रदेशातील इंदोर येथून मुंबईच्या दिशेने मुंबई-नाशिक महामार्गावरून एका ट्रकमधून एक लाख कोटींचा गुटखा विक्रीसाठी घेऊन जात असल्याची माहिती स्थानिक गुन्हे शाखेचे वरिष्ठ पोलिस निरीक्षक दादासाहेब एडके यांना मिळाली होती. त्यानंतर स्थानिक गुन्हे शाखेच्या पथकाने येवई नाका येथे शुक्रवारी पाळत ठेवली. संशयित ट्रक आला असता पोलिस पथकाने विचारपूस केली, तेव्हा ट्रकचा चालक पसार झाला. गुन्हे शाखेच्या पथकाने ट्रकची तपासणी केली असता, गोणीमध्ये ५५ लाख आठ हजार रुपयांचा २७,५४० पॅकेटमधील राजनिवास गुटखा आणि २६ लाख ४३ हजार ८४० रुपयांचा झेड वन सुगंधित तंबाखू असा एकूण ८१ लाख ५१ हजार ८४० रुपये किमतीचा गुटखा जप्त केला. त्यानंतर अन्न सुरक्षा विभागाचे सहाय्यक आयुक्त योगेश ढाणे यांच्या नेतृत्वाखालील अन्न सुरक्षा अधिकारी कस्तुरी चिपळूणकर, अरविंद कांडेलकर यांना पाचारण केले. त्यांनी पंचनामा करून हा मुद्देमाल व ट्रक असा एकूण एक कोटी रुपयांचा मुद्देमला जप्त केला.