दुष्काळी परिस्थितीमुळे
महावितरण ‘हायअलर्ट’

अधिकारी, कर्मचाऱ्यांना मुख्यालय न सोडण्याचे निर्देश

सकाळ वृत्तसेवा
मुंबई, ता. ३ : राज्यात दुष्काळी संकट असल्याने महावितरणने संपूर्ण तांत्रिक यंत्रणेला ‘हायअलर्ट’ जारी केला आहे. शासनाच्या दुष्काळातील उपाययोजनांची अंमलबजावणी करण्यासाठी सर्व अभियंते, यंत्रचालक आणि तारमार्ग कर्मचाऱ्यांना मुख्यालय न सोडण्याचे आदेश देण्यात आले आहेत. याबाबत महावितरणचे संचालक (संचालन) धनंजय औंढेकर यांनी परिपत्रक जारी केले आहे.

राज्यात यंदा जूनपासून पर्जन्यमानात मोठी तूट नोंदवण्यात आली आहे. त्यामुळे राज्याच्या बहुतांश भागात दुष्काळी परिस्थिती निर्माण झाली आहे. पिके संकटात सापडलेली आहेत. याची दखल घेऊन राज्य सरकारने विविध उपाययोजना जाहीर केल्या आहेत. त्यानुसार महावितरणने राज्यभरातील तांत्रिक यंत्रणेला सतर्क केले आहे. त्याचाच भाग म्हणून सर्व क्षेत्रीय कार्यालयांतील अभियंते, यंत्रचालक आणि तारमार्ग कर्मचाऱ्यांना आपापल्या मुख्यालयात उपस्थित राहण्याचे आदेश दिले आहेत. कोणत्याही अधिकारी किंवा कर्मचाऱ्यांना पूर्वपरवानगीशिवाय मुख्यालय सोडता येणार नाही, असे स्पष्ट करण्यात आले आहे. एखाद्या कारणामुळे वीजपुरवठा खंडित झाल्यास पर्यायी व्यवस्थेतून किंवा तातडीने दुरुस्ती कामे करून तो पूर्ववत करण्याच्या सूचना देण्यात आल्या आहेत. या कामात हयगय करणाऱ्यांविरुद्ध शिस्तभंगाची कारवाई करण्यात येईल, असेही या परिपत्रकात स्पष्ट करण्यात आले आहे.