नवी मुंबईत १६ तास पाणीपुरवठा राहणार बंद
नवी मुंबईतील सात विभागांना बसणार फटका
वाशी, ता. ४ (बातमीदार) ः नवी मुंबई पालिकेच्या भोकरपाडा जलशुद्धीकरण केंद्र आणि मुख्य जलवाहिन्यांवर तातडीची तांत्रिक कामे हाती घेण्यात येणार असल्याने शहरात तब्बल १६ तास पाणीपुरवठा बंद राहणार आहे. मंगळवार (ता. ६) रात्री १० वाजल्यापासून ते बुधवार (ता. ७) दुपारी २ वाजेपर्यंत मुख्य जलवाहिनीवरून होणारा पुरवठा पूर्णपणे बंद ठेवला जाणार आहे.
भोकरपाडा जलशुद्धीकरण केंद्रातील १३.५ दशलक्ष लिटर क्षमतेच्या चॅनेलवरील एम.एस. प्लेट बसविणे, नवीन मोटरींग किऑस्क बसविणे, तसेच केंद्राजवळील मोरबे मुख्य जलवाहिनीवर २०५० मि.मी. व्यासाचा जलमापक (फ्लो मीटर) बसविण्याचे काम करण्यात येणार आहे. याशिवाय सीबीडी सेक्टर-७ येथे मोरबे मुख्य जलवाहिनीवर १८०० मि.मी. व्यासाचा बटरफ्लाय व्हॉल्व्ह, वाशीतील अरेंजा सर्कलजवळ ७०० मि.मी. व्यासाचा बटरफ्लाय व्हॉल्व्ह आणि महापे येथे ९०० मि.मी. व्यासाचा बटरफ्लाय व्हॉल्व्ह बसविण्याचे काम हाती घेण्यात येणार आहे.

सात विभागांवर परिणाम
या कामांमुळे बेलापूर, नेरूळ, वाशी, तुर्भे-सानपाडा, कोपरखैरणे, घणसोली आणि ऐरोली विभागातील पाणीपुरवठा बंद राहणार आहे. तसेच, सिडको क्षेत्रातील खारघर व कामोठे नोडमधील पाणीपुरवठ्यावरही परिणाम होणार आहे. पाणीपुरवठा बंद राहिल्यानंतर बुधवार, ७ ऑक्टोबर रोजी सकाळच्या तसेच सायंकाळच्या वेळेतील पाणीपुरवठा कमी दाबाने होण्याची शक्यता महापालिकेने व्यक्त केली आहे. त्यामुळे नागरिकांनी पाण्याचा जपून वापर करून आवश्यक पाणीसाठा करून ठेवावा आणि पाणीपुरवठा विभागाला सहकार्य करावे, असे आवाहन शहर अभियंता शिरीष आरदवाड यांनी केले आहे.