पुणे, ता. ३ : वानवडी परिसरात एका स्कूल बसचालकाने सहा वर्षीय दोन अल्पवयीन मुलींवर बसमध्ये अत्याचार केल्याची घटना घडली आहे. कोरेगाव पार्कमधील एका महाविद्यालयातील अल्पवयीन मुलीवर चौघांनी लैंगिक अत्याचार केल्याची घटना ताजी असतानाच हा धक्कादायक प्रकार समोर आला आहे. याप्रकरणी वानवडी पोलिसांनी स्कूल बसचालकाला अटक केली आहे. न्यायालयाने त्याला मंगळवारपर्यंत (ता. ८) पोलिस कोठडी सुनावली आहे.
संजय जेटिंग रेड्डी (वय ४५, रा. वैदवाडी, हडपसर) असे बसचालकाचे नाव आहे. हा प्रकार ३० सप्टेंबरला घडला. याप्रकरणी एका मुलीच्या आईने वानवडी पोलिस ठाण्यात फिर्याद दिली. त्यावरून बसचालकाविरुद्ध भारतीय न्याय संहिता कलम ६४, ६५ (२) सह लैंगिक अत्याचारापासून बालकांचे संरक्षण अधिनियम (पोक्सो) कलम ४, ८ अन्वये गुन्हा दाखल केला आहे.
पोलिसांनी दिलेल्या माहितीनुसार, फिर्यादी महिलेच्या सहा वर्षीय मुलीने तिला त्रास होत असल्याचे सांगितले. तेव्हा मुलीला विश्‍वासात घेत विचारले. त्यावर मुलीने स्कूल बसचालक संजय अंकलने शाळा सुटल्यानंतर बसमधून घरी येताना तिच्याशी अश्‍लील कृत्य केले. चार दिवसांपासून माझ्यासह मैत्रिणीशीही असेच कृत्य केल्याचे सांगितले. त्यानंतर आईने दुसऱ्या दिवशी मुलीला स्कूल बसमधून शाळेत पाठविले नाही. मुलीच्या वडिलांनी तिला शाळेत सोडले. तिच्या मैत्रिणीच्या वडिलांना हा सर्व प्रकार सांगितला. तिच्या आईनेही खात्री केली. तेव्हा त्या मुलीसमवेतही असाच प्रकार घडल्याचे लक्षात आले. त्यानंतर पालकांनी बुधवारी (ता. २) सायंकाळी वानवडी पोलिस ठाण्यात तक्रार दिली.
याप्रकरणी वानवडी पोलिसांनी बसचालकावर गुन्हा दाखल केला आहे. तसेच, बसचालकाला अटक केल्याची माहिती पोलिस उपायुक्त आर. राजा यांनी दिली.

मुलींची सुरक्षितता ऐरणीवर :
वानवडीतील घटनेमुळे पुन्हा मुलींच्या सुरक्षिततेचा प्रश्न ऐरणीवर आला आहे. शाळा व्यवस्थापनाकडून स्कूल बसचालकांची चारित्र्य पडताळणी केली जाते का? शिक्षण विभागाकडून त्याबाबत काय खबरदारी घेतली जात आहे, असे प्रश्न निर्माण झाले आहेत.

‘‘शाळेतील मुलींवर अत्याचार केल्याची बाब निंदनीय आहे. बाल हक्क संरक्षण आयोगाने एप्रिलमध्ये स्कूल बसबाबत मार्गदर्शक तत्त्वे दिली होती. शाळा व्यवस्थापनाने त्याचे काटेकोर पालन केलेच पाहिजे. शाळा व्यवस्थापनाने बसचालकाची चारित्र्य पडताळणी केली नसेल किंवा बसमध्ये महिला वाहक नसल्यास शाळेवरही गुन्हा दाखल करण्यात येईल. शेवटी मुला-मुलींची सुरक्षा महत्त्वाची आहे. जोपर्यंत मुले-मुली गणवेशात आहेत, तोपर्यंत सुरक्षेची जबाबदारी शाळेची आहे.’’
- ॲड. सुशीबेन शाह, अध्यक्षा, महाराष्ट्र राज्य बालहक्क संरक्षण आयोग