पुजेच्या साहित्याने रेवदंड्याची बाजारपेठ सजली; पावसाने खरेदीवर परिणाम
रेवदंडा, ता. २५ (बातमीदार) : गणेशोत्सवाच्या आगमनाला फक्त एक दिवस उरल्यामुळे रेवदंडा परिसरातील बाजारपेठेत पूजा साहित्य खरेदीसाठी गर्दी दिसून येत आहे. विशेषतः पुजनाच्या साहित्याचे तयार पॅकेजेस अनेक ठिकाणी विक्रीसाठी उपलब्ध आहेत. यात अभीर, गुलाल, पिंजर, हळद, शेंदूर, सुपारी, नाडा, जान्हवे, अत्तर, मध, कापूस, वस्त्र, गंधगोळी अशा वस्तूंचा समावेश आहे.
सध्या कापूस, कपूर, उदबत्ती यांसारख्या वस्तूंच्या किमती गतवर्षीच्या तुलनेत वाढलेल्या दिसून येत आहेत. उदबत्ती दहा रुपयांपासून पाचशे रुपयांपर्यंत विक्रीस उपलब्ध आहे. विविध प्रकारचे धूप, कांड्या, पावडर पाचशे रुपयांपासून सुरू होत असून, साजूक तूपातील वातीही भिजवलेल्या डब्यात विक्रीस उपलब्ध आहेत. विड्याच्या पानांची ८० रुपये शेकड्यांमध्ये विक्री होत आहे. अक्रोड, बदाम, खारीक यांची विक्रीदेखील जोरात होत आहे. आज (ता. २५) सकाळपासूनच पावसाने हजेरी लावल्यामुळे बाजारपेठेत आलेल्या खरेदीदारांची संख्या अपेक्षेपेक्षा कमी होती. पडलेल्या पावसामुळे रस्त्यावरील विविध विक्रेते, हातगाडी व्यावसायिक यांना मोठा फटका बसला आहे. जीवनावश्यक वस्तूंची खरेदी तसेच हलवाई विक्रेत्यांकडे ग्राहकांची वर्दळ घटलेली दिसली. अनेक नागरिक छत्री किंवा रेनकोट घेऊन आले नसल्यामुळे त्यांनी रिक्षेचा आधार घेऊन तातडीने घर गाठले.