रेवदंडा-रोहा एसटी वारंवार रद्द
प्रवाशांचा संताप वाढला
चाकरमानी, विद्यार्थी आणि प्रवाशांना खासगी वाहनांचा पर्याय; प्रशासनाकडून दखल घेण्याची मागणी
रेवदंडा, ता. ७ (बातमीदार) : रेवदंडा बस स्थानकातून दुपारी २ वाजता सुटणारी रेवदंडा-रोहा एसटी (लालपरी) वारंवार अचानक रद्द होत असल्याने प्रवाशांना मोठ्या गैरसोयीला सामोरे जावे लागत आहे. ही बस रद्द झाल्यास प्रवाशांना पुढील ३ वाजताच्या बसची वाट पाहावी लागते किंवा खासगी वाहनांचा आधार घ्यावा लागतो.
या बसवर रोहा मार्गे दिवा रेल्वेने प्रवास करणारे चाकरमानी मोठ्या प्रमाणात अवलंबून आहेत. बस रद्द झाल्यास त्यांच्या कामाच्या वेळापत्रकावर परिणाम होतो. वळके, चोरडा, कोकबन, चणेरा या गावांतील प्रवासी आठवड्यातून किमान एकदा तरी या सेवेमुळे प्रवास करतात.
मुरूड आगारातून सकाळी भांडुपकडे जाणारी बसही अनेकदा रद्द होत असल्याने समस्येत भर पडत आहे. बस स्थानकातील वाहतूक नियंत्रक कक्ष सकाळी उशिरा उघडत असल्याने प्रवाशांना योग्य माहिती मिळत नाही. उन्हाळी सुट्ट्या आणि लग्नसराईच्या हंगामात ही समस्या अधिक तीव्र झाली आहे.
प्रशासनाने या बाबीकडे तातडीने लक्ष देऊन बससेवा नियमित करावी, अशी मागणी प्रवाशांकडून होत आहे.