जिंदाल विद्यामंदिरचे बारावीच्या निकालात यश

रेवदंडा, ता. १४ (बातमीदार) ः मुरूड तालुक्यातील साळाव येथील जिंदाल विद्यामंदिर विद्यालयाने सीबीएसई बारावीच्या निकालात शंभर टक्के यशाची परंपरा यंदाही कायम राखली आहे. बुधवारी (ता. १३) जाहीर झालेल्या निकालात परीक्षेला बसलेल्या सर्व ३२ विद्यार्थ्यांनी उत्तीर्ण होत उल्लेखनीय यश मिळवले.
वाणिज्य शाखेत स्वयम वाकडे याने ८६ टक्के गुणांसह प्रथम क्रमांक पटकावला. इबाद मुकादम (८५ टक्के) द्वितीय, तर कृष्णा दिवेकर (७४ टक्के) तृतीय ठरली. विज्ञान शाखेत सोहम घरत याने ७९ टक्के गुण मिळवत अव्वल स्थान मिळवले. अन्वेशा भट्टाचार्य (७८ टक्के) द्वितीय, तर इस्माईल मुकादम (७६ टक्के) तृतीय क्रमांकावर राहिला.
या यशाबद्दल प्राचार्य मुकेश ठाकूर यांनी शिक्षकांचे मार्गदर्शन आणि विद्यार्थ्यांची मेहनत हेच यशाचे सूत्र असल्याचे सांगितले. उपप्राचार्य मंगेश बमनोटे, शाळा व्यवस्थापन समिती अध्यक्ष पंकज मलिक, जे.ई.टी. प्रमुख डॉ. भावेश भालेराव व शिक्षकांनी विद्यार्थ्यांचे अभिनंदन केले.