विरार, ता. ७ (बातमीदार) : वसई-विरार शहर महापालिकेच्या नालासोपारा-आचोळे येथील नाट्यगृह व विरार-बोळिंज येथील क्रीडा संकुलाच्या लोकार्पण सोहळ्याच्या निमित्ताने उडालेला गोंधळ आणि नियमबाह्य निमंत्रण पत्रिकेबाबत ४ ऑक्टोबरला महापौरांनी घेतलेल्या पत्रकार परिषदेतील सर्व खुलाशांचे विरोधी पक्षनेते मनोज पाटील यांनी ५ ऑक्टोबरला पत्रकार परिषद घेऊन जोरदार खंडन केले. महापौर आणि त्यांच्या विधानांचा या वेळी समाचार घेतला.

बहुजन विकास आघाडी  आपल्या चुका मान्य करण्याऐवजी त्याचे समर्थन करीत असून, प्रोटोकॉल आणि शासकीय नियमांची पायमल्ली करीत असल्याचा आरोप मनोज पाटील यांनी केला. याप्रसंगी त्यांच्यासोबत भाजप जिल्हाप्रमुख प्रज्ञा पाटील आणि गटनेते अशोक शेळके  उपस्थित होते.

 पत्रकारांशी संवाद साधताना मनोज पाटील यांनी महापौरांच्या भूमिकेवर कडक शब्दांत ताशेरे ओढले. शासकीय निर्णय (जीआर) म्हणजे कायदा नाही, असे वक्तव्य करून घटनात्मक पदावर बसलेल्या महापौरांनी अराजकता माजवणारी भूमिका घेतली आहे याचा आम्ही तीव्र निषेध करतो, असे पाटील म्हणाले. लोकशाही मार्गाने निवडून आलेल्या लोकप्रतिनिधींचा व राजशिष्टाचाराचा मान ठेवणे ही महापालिकेची घटनात्मक जबाबदारी आहे. मात्र, महापालिका आयुक्तांना अंधारात ठेवून आणि जिल्हाधिकारी कार्यालयाकडून प्रोटोकॉलनुसार निमंत्रण पत्रिका मंजूर न करून घेता महापौरांनी परस्पर निमंत्रणे पाठवून राजकीय स्वार्थ साधण्याचा प्रयत्न केला आहे.

अराजक कारभार खपवून घेणार नाही
महायुतीच्या सर्व पदाधिकाऱ्यांनी या नियमबाह्य कारभाराविरोधात आणि लोकप्रतिनिधींच्या अवमानाविरोधात एकत्र येऊन आपला आवाज उठवला असून, इथून पुढे अशा प्रकारचा अराजक कारभार खपवून घेतला जाणार नाही, असा इशारा पाटील यांनी दिला.