वाशी : शिवडी न्हावा-शेवा ते उरण यांना जोडणारा माजी पंतप्रधान अटल बिहारी वाजपेयी यांच्या नावे नामकरण करण्यात आलेला भारतातील सर्वात जास्त लांबीचा अटल सेतू जितका त्याच्या लांबीसाठी आणि वेगवाग प्रवासासाठी प्रसिद्ध व्हायला हवा त्यापेक्षा जास्त त्यावरील प्रवाशांच्या बेशिस्त वागणुकीमुळे हा सेतू चर्चिला जात आहे.

अटल सेतूचे उद्घाटन नुकतेच १२ जानेवारीला पंतप्रधान नरेंद्र मोदी यांच्या हस्ते करण्यात आले. मात्र अवघ्या तीन-चार दिवसांत बेशिस्त वाहन चालकांनी पुलावरून आसपासच्या निसर्गाचा आनंद लुटण्यासाठी ठिकठिकाणी गाड्या थांबवून वाहतुकीसाठी अडथळा निर्माण केल्याचे आढळून येत आहे.

सुरक्षा खांबांवर चढून वाहन चालक व प्रवासी सेल्फी काढताना आढळून येत आहेत तसेच फोटो शूट देखील करताना आढळून येत आहेत. या बेशिस्त वाहन चालकांना आळा बसावा म्हणून वाहतूक पोलिसांतर्फे दोन गस्ती पथके सुद्धा तैनात करण्यात आलेली असून १४४ पेक्षा अधिक वाहनांना कलम १२२/१७७ मोटर वाहन कायद्यानुसार ५०० ते १५०० पर्यंतचा दंड देखील ठोठावण्यात आला आहे.

परंतु वाहन चालकांना या दंडाने विशेष फरक पडलेला दिसून येत नाहीए. उलट वाहन चालक या अटल सेतूवर सेल्फी पॉईंट उभारण्याची मागणी करताना दिसत आहेत. वाहन चालकांच्या मते भविष्यात या ठिकाणी एक उत्तम सनसेट पॉईंट तयार होऊ शकतो व त्याने नागरिकांना आणि पर्यटकांना या निसर्ग सौंदर्याचा आनंद लुटता यावा म्हणून सेल्फी पॉईंट किंवा सनसेट पॉईंट तयार व्हावा अशी मागणी वाहन चालकांनकडून करण्यात येत आहे.

या बद्दल नागरिकांच्या विविध चांगल्या-वाईट प्रतिक्रिया येत असल्या तरीही भविष्य काळात या अटल सेतुवरील वाहुक सुरळीत होऊन शिवडी न्हावा-शेवा ते उरण हा प्रवास वेगवान होऊन नवी मुंबई तसेच मुंबईच्या विकासासाठी एक महत्वाचा दुवा ठरेल अशी आशा आहे.

- प्रथमेश गडकरी