ठाणे : नौपाडा परिसरात पाण्याच्या टाकीची साफसफाई (water tank cleaning) करताना दोघांचा मृत्यू (two person death) झाल्याची घटना ताजी असताना, मुंब्र्यात मलनिस्सारण टाकी साफ करताना दोघांचा मृत्यू झाल्याची बाब बुधवारी सायंकाळी साडेसहा वाजण्याच्या सुमारास समोर आली. अशी माहिती आपत्ती व्यवस्थापन विभागाने (Disaster management department) दिली. मुंब्र्यातील कौसा स्टेडियमच्या बाजूला, तलावपाली रोड, येथील ग्रेस स्क्वेअर सोसायटीच्या आवारातील मलनिस्सारण टाकी साफ करण्याचे काम सुरू होते.

हनुमान व्‍यंकटी कोरपक्ववाड (२५) आणि सुरज राजू मढवी (२२) हे दोघे टाकीत उतरले होते. याचदरम्यान ते दोघे त्या टाकी बेशुद्ध झाल्याची माहिती मिळताच त्यांना त्याच इमारतीतील काही रहिवाश्यांनी टाकीमधून बेशुद्ध अवस्थेत बाहेर काढून जवळील खासगी रुग्णालय येथे उपचाराकरिता दाखल केले असता तेथील डॉक्टरानी त्यांना मृत घोषित केले. हा प्रकार साधारणपणे सांयकाळी साडेसहा वाजण्याच्या सुमारास घडल्याची माहिती आपत्ती व्यवस्थापन अधिकारी अविनाश सावंत यांनी दिली.