मनोर : मुंबई अहमदाबाद महामार्गावर नादुरुस्त कंटेनरला धडक दिल्याने झालेल्या अपघातात दुचाकीस्वाराचा मृत्यू झाला आहे. गुरुवारी (ता.16)रात्री दहा वाजताच्या सुमारास सातीवली गावच्या हद्दीत गुजरात मार्गिकेवर हा अपघात झाला होता.एस आर सोमसेक्रिया (वय.52)असे मयत दुचाकीस्वाराचे नाव असून तो डहाणूचा रहिवासी होता.नादुरुस्त वाहने महामार्गावरून हटविण्यात महामार्गाची कंत्राटदार कंपनीकडून होत असलेले दुर्लक्ष दुचाकीस्वारांच्या जीवावर बेतत असल्याने संताप व्यक्त केला जात आहे.

सातीवली गावच्या वळणावर महामार्गाच्या गुजरात वाहिनीवर नादुरुस्त कंटेनर उभा होता.रात्री दहा वाजताच्या सुमारास भरधाव वेगातील दुचाकीने कंटेनरला मागच्या बाजूने धडक दिल्याने अपघात झाला होता.या अपघातात डोक्याला गंभीर स्वरूपाच्या दुखापती झाल्याने दुचाकीस्वाराचा जागीच मृत्यू झाला.याप्रकरणी कंटेनर चालकावर गुन्हा दाखल करण्यात आला आहे.महामार्गावर नादुरुस्त होणारी अवजड वाहने टोल वसूल करणाऱ्या कंपनी कडून वेळीच हटवली जात नाही. त्यामुळे महामार्गावर अपघातांची संख्या वाढली आहे.पेट्रोलिंग कर्मचाऱ्यांचे दुर्लक्षामुळे महामार्गावरील अपघातांमध्ये दुचाकीस्वारांचा नाहक बळी जात आहे.