Sushma Andhare Speech: आज मुंबईत शिवसेनेच्या दोन्ही गटाकडून दसरा मेळाव्याचे आयोजन करण्यात आले आहे. एकनाथ शिंदे यांचा दसरा मेळावा आझाद मैदानावर होणार आहे. तर उद्धव ठाकरे यांचा दसरा मेळावा शिवाजी पार्कवर पार पडत आहे. यावेळी उद्धव ठाकरेंच्या दसरा मेळाव्यात सुषमा अंधारे यांनी भाषण केले आहे. यावेळी त्यांनी महायुती सरकारवर जोरदार टीका केली आहे. तसेच लाडकी बहीण योजनेवरून सरकारला धारेवर धरलं आहे.

सुषमा अंधारे म्हणाल्या की, महायुती सरकारने राज्याचा खेळखंडोबा केला आहे. राज्यातील न्यायव्यवस्थेला वेठीस धरण्याचा प्रयत्न या सरकारने केला आहे. हे झाकण्यासाठी आश्वासनांची खैरात सुरू केली. ते म्हणाले विरोधकांना लाडकी बहीण योजना खुपत आहे. मात्र ही योजना खुपायचं कारण काय आहे? लाडक्या बहिणीने पैसे घेतले पाहिजेत. कारण लक्षात असू दे, जे पैसे मिळत आहेत, ते पैसे देवेंद्र फडणवीस यांनी नागपूरचा बंगला विकून दिलेले नाही. तसेच ते पंधराशे रुपये एकनाथ शिंदेंनी त्यांची जमीन विकून दिलेले नाहीत. दोघांनीही त्यांच्या खिशातून हे पैसे दिले नाहीत. हे पैसे आमच्या कष्टाचे आहेत. नागरिकांनी जो टॅक्स भरला त्याचे हे पैसे आहेत. तुम्ही याचं क्रडिट घेऊ नका, असं म्हणत अंधारेंनी सरकारवर टीकास्त्र डागलं आहे.

उपमुख्यमंत्री देवेंद्र फडणवीसांनी राज्यात जातीत जात ठेवली नाही. मोहन भागवतांनी फडवीसांना समजवावं. देवेंद्र फडणवीस यांनी राज्यात जातीय द्वेष पसरवलाय. बहिणीला पैसे दिल्यावर आपण कधी बॅनर लावले का? कारण आपल्याला नात्यांची किंम्मत माहिती आहे. मात्र या सरकारला बहिणीचे नाते कळले नाही. हे सरकार बाईपणावर हल्ले करत आहे. मात्र हे बाळासाहेबांचे संस्कार असू शकत नाही. हे संस्कार रेशीमबागेतील आरएसएसच्या बाटगेंचे असू शकतात. हे सरकार बहिणींना पैसे देऊ शकतं पण ज्या महिलेवर अत्याचार झाला आहे, तिला न्याय देऊ शकत नाही, असं म्हणत सुषमा अंधारे यांनी जोरदार निशाणा साधला आहे.