डोंबिवली : मुख्यमंत्री उद्धव ठाकरे (cm uddhav Thackeray) आणि केंद्रीय राज्य मंत्री नारायण राणे (Narayan rane) यांच्यातील वाद काही शमण्याचे नाव घेत नाही. स्वातंत्र्य दिनाच्या (Independence day) अमृत महोत्सवी वर्षाला हिरक महोत्सवी वर्ष संबोधल्याने भारतीय जनता युवा मोर्चाच्या (BJP) वतीने मुख्यमंत्र्यांच्या वर्षा निवासस्थानी 75 हजार पत्र (Letter to cm) पाठविण्यात येणार आहेत. यात कल्याण डोंबिवलीतून (kalyan-dombivali) 2 हजार पत्रे जाणार आहेत.

भारताला स्वातंत्र्य मिळून किती वर्षे झाली हे मुख्यमंत्री पदावर असलेल्या व्यक्तीला माहीत नसणे हे राज्याचे दुर्दैव आहे. हे मुख्यमंत्री पदावर असलेल्या व्यक्तीला माहीत नसणे शोभत नाही. आमचा देश हा आमच्या अस्मितेचा विषय आहे अशा आशयाचे पत्र मुख्यमंत्र्यांना राज्यभरातून पाठविण्यात येणार आहेत. डोंबिवलीतील एमआयडिसी पोस्ट ऑफिस येथून प्रातिनिधिक स्वरूपात पत्र शनिवारी पाठविण्यात आल्याचे भारतीय जनता युवा मोर्चाचे कल्याण जिल्हा अध्यक्ष मिहीर देसाई यांनी सांगितले. यावेळी जिल्हा उपाध्यक्ष अथर्व ताडफळे, जिल्हा सचिव चिंतन देढिया, ग्रामीण मंडल सरचिटणीस चैतन्य काळण, रतन पुजारी, गांधार कुलकर्णी, संदीप शर्मा, अपूर्व कदम हे जिल्हा पदाधिकारी उपस्थित होते.