मुंबईः  उल्हासनगरमध्ये खासगी कोविड रुग्णालयातल्या आयसीयूमध्ये स्फोट झाल्याची माहिती समोर आली आहे.  कल्याण-बदलापूर महामार्गावर शांतीनगर स्मशानभूमी चौकाजवळ असलेल्या मॅक्स लाईफ हे खासगी रुग्णालय आहे. या रुग्णालयातल्या कोविडच्या आयसीयू मधील वातानुकूलित यंत्रणेत स्फोट झाला. या स्फोटामुळे भीषण आग लागल्याची घटना कालरात्री उशिराने उल्हासनगरात घडली. अग्निशमन दल आणि शिवसेनेने धाव युद्धपातळीवर मदतकार्य करत 19 रुग्णांना बाहेर काढल्याने सुदैवाने जीवितहानी टळली आहे.

मॅक्स लाईफमध्ये 14 कोविड आणि 5 कोविडची लक्षणे असणारे रुग्ण उपचार घेत होते. त्याचवेळी आयसीयूमध्ये असलेल्या वातानुकूलित यंत्रणेत भीषण स्फोट झाला. रुग्णांसोबत डॉक्टर्स, स्टाफ यांच्यात भीतीचे वातावरण पसरले. धुराचे रूपांतर आगीत झाल्यावर तात्काळ अग्निशमन दलाचे मुख्य अधिकारी बाळू नेटके यांच्या मार्गदर्शनाखाली संदीप आसेकर आणि दलाचे कर्मचारी, शिवसेना शहरप्रमुख राजेंद्र चौधरी यांनी शिवसैनिकांसोबत धाव घेतली. रोड बंद करून आणि रुग्णांना बाहेर काढून त्यांना कल्याण डोंबिवली येथील खासगी कोविड रुग्णालयात ऍडमिट करण्यात आले. अग्निशमन दलाने दोन तासात आग आटोक्यात आणली.

मुंबई विभागातल्या बातम्या वाचण्यासाठी येथे क्लिक करा.

स्फोट आणि आग शॉर्टसर्किटमुळे लागल्याचा प्राथमिक अंदाज रुग्णालय प्रशासनाने व्यक्त केला आहे. अत्याधुनिक मशिनरी जळून खाक झाल्याने नुकसान कितीचे झाले याचा अहवाल तयार करण्यात येत आहे.

महत्त्वाची बातमी-  ठाणेः परराज्यातून रेल्वेनं दाखल झालेले तब्बल 448 प्रवासी कोरोनाबाधित

------------------------

(संपादन- पूजा विचारे)

Ulhasnagar Explosion ICU Covid 19 max life Hospital 19 patients safely released