उल्हासनगर - टॅक्स वसुलीचा मागच्या वर्षीचा रेकॉर्ड ब्रेक करण्यासाठी उल्हासनगर महानगरपालिका आयुक्त विकास ढाकणे, अतिरिक्त आयुक्त जमीर लेंगरेकर यांनी कंबर कसली असून त्यासाठी शनिवारी 28 तारखेला एक दिवसीय अभययोजना जाहीर करण्यात आली आहे. थकबाकीची रक्कम एकत्रित भरल्यास त्यावर शंभर टक्के व्याज माफ करण्यात येणार असल्याची माहिती कर निर्धारक व संकलक निलम कदम यांनी दिली.

2023-24 मध्ये तत्कालीन मालमत्ता कर उपायुक्त प्रियंका राजपूत यांच्या कालावधीत टॅक्सची 111 कोटींच्या वर वसूली झाली होती. ही आजमितीपर्यंतची सर्वाधिक वसूली आहे. विशेष म्हणजे प्रियंका राजपूत या महिला अधिकाऱ्यानंतर आयुक्त विकास ढाकणे, अतिरिक्त आयुक्त जमीर लेंगरेकर यांच्या मार्गदर्शनाखाली कर निर्धारक व संकलक निलम कदम या महिला अधिकाऱ्याने उपकर निर्धारक व संकलक सचिन वानखेडे, मनोज गोकलानी आणि आठ कर निरीक्षक या टीम सोबत वसुलीची आगेकूच सुरू केली असून त्याची बोलकी आकडेवारी हाती आली आहे.

यापूर्वी 2023 मध्ये मालमत्ता कराची 1 एप्रिल ते 23 सप्टेंबर पर्यंत 46 कोटी 52 लाख रुपये वसूली झाली होती. आणि यावर्षी 2024 मध्ये 1 एप्रिल ते 23 सप्टेंबर 54 कोटी 80 लाख 94 पर्यंत वसूली झालेली आहे. 28 तारखेला असणाऱ्या एक दिवसीय अभययोजनेत किती कोटींची वसूली होते याकडे पालिका अधिकाऱ्यांचे लक्ष लागले आहे.

हीच बोलक्या वसुलीची आकडेवारी पाहता पुण्यामध्ये इन्फ्रास्ट्रक्चर मॅन म्हणून ओळख निर्माण करणारे विकास ढाकणे यांच्या मार्गदर्शनाखाली अतिरिक्त आयुक्त जमीर लेंगरेकर, कर निर्धारक व संकलक निलम कदम यांची टीम जुन्या 111 कोटींच्या वसुलीचा रेकॉर्ड ब्रेक करण्यासाठी आगेकूच करत असल्याचे चित्र दिसू लागले आहे.