भिवंडी : भिवंडी शहर महापालिका कार्यक्षेत्रात राहणाऱ्या नागरिकांना पाणी जोडणी व इतर विविध परवानगींसाठी "ऑनलाईन अर्ज' प्रक्रिया सुरू करण्यात आली आहे. मात्र पालिकेने सुरू केलेल्या या ऑनलाईन प्रक्रियेपासून शहरातील बहुतांश आजी-माजी लोकप्रतिनिधी आणि करदाते नागरिक अनभिज्ञ आहेत. पालिकेत बांधकाम व इतर कामांच्या परवानगीसाठी गेलेल्या नागरिकांना काही कर्मचारी व अधिकारी "ऑनलाईन अर्ज करा', असे सांगून त्यांना वाटेला लावत आहेत. त्यामुळे सर्वसामान्य नागरिक व कामगार वर्गातून संताप व्यक्त होत आहे. 

सरकारी आदेशानुसार भिवंडी महापालिकेने नागरिकांना नवीन नळ जोडणी, घरपट्टी, पाणीपट्टी, जन्म-मृत्यू दाखला, बांधकाम व इमारत बांधकाम अशा विविध प्रकारच्या परवानगी देण्यासाठी संगणकांवर ऑनलाईन प्रक्रिया सुरू केली आहे. या सुविधेबाबत जनजागृती न झाल्यामुळे सर्वसामान्य नागरिक या सुविधेबद्दल अनभिज्ञ आहेत.

नागरिक विविध प्रकारच्या परवानगी घेण्यासाठी महापालिकेत गेल्यावर तेथील कर्मचारी नागरिकांना ऑनलाईन अर्ज करा, असे सांगतात. मात्र, ऑनलाईन प्रक्रियेबाबत काहीच माहिती नसल्याने नागरिकांची पंचाईत होत आहे. भिवंडी हे कामगार-मजूर वर्गाचे शहर असून साक्षरतेअभावी अनेक जण या ऑनलाईन प्रक्रियेपासून अनभिज्ञ असल्याचे व्यावसायिक दिनेश शेट्टी यांनी सांगितले. 

पालिकेत नागरिक गेल्यावर अधिकारी व कर्मचारी वर्ग त्यांना अवमानकारक वागणूक देऊन परत पाठवतात. त्यामुळे नागरिकांमधून संताप व्यक्त होत आहे. याबाबत काही नागरिकांनी विरोधी पक्षनेते यशवंत टावरे, निलेश चौधरी यांच्याकडे तक्रार करताच त्यांनी तात्काळ आयुक्त डॉ. प्रवीण आष्टीकर यांची भेट घेत या प्रकरणी लक्ष द्यावे, नागरिकांचे अर्ज ऑफलाईन स्वीकारून त्यांना विविध प्रकारच्या परवानगी देण्यात याव्यात, अशी मागणी केली आहे.

दरम्यान, महापालिकेच्या ऑनलाईन प्रणालीमध्ये नेहमी घोळ असतो. ऑनलाईन मालमत्ता कर भरून देखील ती थकबाकी दाखवत असल्याचे समाजसेवक जलील अन्सारी यांनी सांगितले. 

सर्व सामान्य नागरिकांचा सुविधेसाठी ऑनलाईन प्रक्रिया सुरू केली आहे. त्यामुळे नागरिकांचा पालिकेत येण्याचा वेळ व खर्च वाचतो. पालिका अधिकारी व कर्मचाऱ्यांनी नागरिकांचे अर्ज स्वीकारून त्यांना सहकार्य करावे, असे आदेश दिले आहेत. 
- डॉ. प्रवीण आष्टीकर, 
आयुक्त, भिवंडी महापालिका.