भाईंदर ः पावसाळा सुरू झाला की आपल्याकडे विविध सण सुरू होतात. नारळी पौर्णिमा, गणपती, दिवाळीसह देशात कोजागरी म्हणजेच नवान्नपौर्णिमा हा सण साजरा केला जातो. या दिवशी नव्याने आलेली भाताची कणसे काढून त्याचे तोरण बनवले जाते, तसेच त्याची पूजाही केली जाते. असाच सण ख्रिश्‍चन धर्मीय बांधवांमध्येही साजरा केला जातो. तो म्हणजे "आगेऱ्याचा सण.' या दिवशी शेतात जाऊन त्याठिकाणी फादर (धर्मगुरू) आणि गावकरी एकत्र मिळून प्रार्थना करतात आणि मग फादर शेतातील काही कणसे कापून ती वाजत-गाजत चर्चमध्ये आणतात.
आजही ठाणे, मुंबई, वसई या परिसरातील आगरी, कोळी व इस्टइंडियन ख्रिश्‍चन धर्मीय बांधव भाताचे (तांदूळ) पीक घेतात. पूर्ण पावसाळ्यात एकमेकांच्या मदतीला जाऊन आळी पाळीने भाताच्या लागवडीपासून ते कापणीपर्यंत एकत्रित काम करतात. जेव्हा शेतात भाताची कणसे येतात तेव्हा कापणी अगोदर पहिली कापणी करून देवाला अर्पण करण्याची परंपरा आजही काही ठिकाणी सुरू आहे. यात भाईंदरजवळील उत्तन गावाचा समावेश आहे. या ठिकाणी नागरिक एकत्र येऊन चर्चच्या परिसरातील शेतात जाऊन सर्व भाविक व धर्मगुरू प्रथम एकत्र प्रार्थना करतात, देवाचे आभार मानतात, आमच्या मेहनतीचे फळ आम्हाला दिले व चांगल्या प्रकारे पीक भरभरून आले असे म्हणतात. तसेच, कापणी अगोदर काही भागातील कणसे कापून चर्चमध्ये भक्तिभावाने मिरवणुकीद्वारे घेऊन येतात.
चर्चमध्ये पूर्ण प्रार्थना, विधी आटोपल्यानंतर ती कणसे सर्व भाविकांना थोडी-थोडी वाटली जातात. ही कणसे भाविक आपल्या देवघरात वर्षभर सांभाळून ठेवतात. त्यामागचा हेतू असा की, असाच धान्याचा साठा आम्हाला वर्षभर मिळावा व घरात धान्याची टंचाई भासू नये. काही भाविक आपल्या घरात देवघरात ठेवलेल्या कणसांची पूजा-अर्चा करतात. या भात कापणीच्या सणाला आगेऱ्याचा सण असे नाव आहे.
--------------------------------------------
( संपादन - तुषार सोनवणे )
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.