आज पालघर येथे पंतप्रधान नरेंद्र मोदी यांच्या हस्ते वाढवण बंदराच्या भूमिपूजनाचा सोहळा पार पडणार आहे. या कार्यक्रमासाठी उरणच्या रयत शिक्षण संस्थेच्या वीर वाजेकर कला, विज्ञान आणि वाणिज्य महाविद्यालयातील विद्यार्थ्यांना शैक्षणिक सहलीच्या नावाखाली नेण्यात आले आहे. या घटनेमुळे स्थानिक पातळीवर संताप निर्माण झाला असून शिवसेनेच्या युवा सेनेने सरकारच्या या निर्णयाविरोधात आक्षेप नोंदवला आहे.
शिवसेना युवा सेनेकडून सरकारवर आरोप करण्यात आला आहे की, विद्यार्थ्यांना जबरदस्तीने शैक्षणिक सहलीच्या नावाखाली या भूमिपूजनाच्या कार्यक्रमाला नेण्यात आले आहे. शिवसेनेच्या मते, हा प्रकार विद्यार्थ्यांच्या शैक्षणिक अभ्यासक्रमात अडथळा निर्माण करणारा आहे. परीक्षेच्या काळात अशा प्रकारे विद्यार्थ्यांना नेल्यामुळे त्यांच्या शिक्षणावर विपरीत परिणाम होऊ शकतो.
वाढवण बंदर पायाभरणी सोहळ्याच्या निमित्ताने सरकारकडून मोठ्या प्रमाणात गर्दी जमवण्याचा प्रयत्न केला जात आहे. यासाठी विद्यार्थ्यांकडून हमीपत्र लिहून घेतले गेले आहे की ते स्वेच्छेने या कार्यक्रमात सहभागी होत आहेत. दुपारी दिड वाजता कार्यक्रम आहे.
युवा सेनेकडून तक्रार दाखल.
युवा सेनेकडून उच्च आणि तंत्र शिक्षण सचिव तसेच मुंबई विद्यापीठाचे कुलगुरू यांच्याकडे या संदर्भात तक्रार दाखल करण्यात येणार आहे. राजकीय कार्यक्रमासाठी विद्यार्थ्यांचा वापर हा शिक्षणाच्या मूलभूत तत्त्वांच्या विरोधात आहे, असे युवा सेनेकडून सांगण्यात येत आहे. "राजकीय कार्यक्रमासाठी शैक्षणिक सहलीचा वापर हा विद्यार्थ्यांच्या हक्कांवर आक्रमण आहे," असे शिवसेना युवा सेनेचे नेते म्हणाले आहेत.
माजी सिनेट सदस्य प्रदीप सावंत यांनीही या घटनेबाबत आपली भूमिका स्पष्ट केली आहे. "शिक्षण हा विद्यार्थ्यांचा हक्क आहे आणि त्याचा गैरवापर होऊ नये यासाठी आपण प्रयत्न करायला हवे," असे ते म्हणाले. त्यांनी या प्रकरणात सरकारकडून स्पष्टीकरण मागितले आहे आणि योग्य ती कारवाई करण्याची मागणी केली आहे.
वाढवण बंदराच्या भूमिपूजनाच्या निमित्ताने उरण आणि रायगड भागातील स्थानिक जनतेमध्ये या कार्यक्रमाबाबत तीव्र विरोध पाहायला मिळत आहे. स्थानिकांच्या विरोधामुळे ते या कार्यक्रमात सहभागी होणार नसल्याचे स्पष्ट केले आहे. त्यामुळे सरकारकडून विद्यार्थ्यांना सहभागी करून घेऊन गर्दी वाढवण्याचा प्रयत्न केला जात असल्याचा आरोप शिवसेनेकडून केला जात आहे.
वाढवण बंदर भूमिपूजनाच्या या प्रकरणामुळे महाराष्ट्रात राजकीय वातावरण तापले आहे. विद्यार्थ्यांच्या सहभागाच्या मुद्द्यावरून राजकीय पक्षांमध्ये वाद उभा राहिला असून, हा मुद्दा आगामी काळातही चर्चेत राहण्याची शक्यता आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.