मुंबई - एसएनडीटी महिला विद्यापीठाच्या कुलगुरू प्रा. डॉ. उज्वला चक्रदेव यांचा केंद्रीय रक्षा मंत्रालयाच्या अंतर्गत येणाऱ्या राष्ट्रीय छात्र सेना(एनसीसी)मार्फत प्रदान करण्यात येणाऱ्या अत्यंत सन्मानाची मानद कर्नल स्तरावरील पदवी प्रदान केली जाणार आहे. यासोबतच भारतीय डॉक्यूमेंटरी प्रोड्युसर्स असोसिएशनमार्फत दिला जाणारा 'भारतीय संस्कृती संरक्षण सम्मान' ही सन्मानाची पदवीही त्यांना प्रदान केली जाणार आहे. शुक्रवारी, २६ जुलै रोजी, दुपारी २ वाजता, विद्यापीठाच्या चर्चगेट संकुलातील पाटकर सभागृहात यासाठी विशेष कार्यक्रमाचे आयोजन करण्यात आले आहे.

राज्य एनसीसी संचालनालयाचे अतिरिक्त महासंचालक मेजर जनरल योगेंदर सिंह यांच्या प्रमुख उपस्थितीत कर्नल ही मानद पदवी कुलगुरू डॉ. चक्रदेव यांना प्रदान केली जाणार आहे. यावेळी विद्यापीठात एससीसी आणि एनएसएसच्या विद्यार्थ्यांचे खास संचालनही आयोजित केले जाणार आहे. तर या विशेष कार्यक्रमाला विद्यापीठातील सर्व विभागाचे अधिष्ठाता, प्राध्यापकांसह अनेक मान्यवर उपस्थित राहणार आहेत.

सामाजिक बांधिलकी आणि राष्ट्रहिताची भावना रूजवत कुलगुरू डॉ. उज्वला चक्रदेव यांनी विद्यार्थ‍िनी कल्याण आणि त्यांच्या विकासासोबतच मुलींच्या उच्च शिक्षणासासाठी यांनी मोठे योगदान दिले आहे. त्यांच्या कार्यकाळात एसएनडीटी विद्यापीठात अनेक प्रकारचे चांगले बदल झाले असून राज्य स्तरावर राष्ट्रीय शैक्षणिक धोरणाची अंमलबजावणी करण्यासाठी सरकारने नेमलेल्या समूह विद्यापीठ आदी समित्यांचे त्यांनी प्रमुख पद भूषवले आहे.

तर एनईपीच्या अंमलबजावणीसाठी राज्यात पहिल्यांदा एसएनडीटी विद्यापीठात अभ्यासक्रम सुरू करण्याचा विक्रमही त्यांच्या नावे नोंदविण्यात आला आहे. तर दुसरीकडे भारतीय संस्कृतीच्या वारशाचे जतन करण्यासोबत भारतीय प्राचीन मंदिरांची परंपरा आणि त्यांचे महत्व विशद करणारे अत्यंत मोलाचे संशोधन त्यांनी केले आहे. त्यांचा नुकताचे 'टेम्पल ऑफ भारत' हा ग्रंथ नुकताच प्रकाशित झाला असून त्याचा गौरव हा दोन मानद पदव्याच्या निमित्ताने होणार आहे.