मुंबई : विधानसभा निवडणुकीसाठी राज्यातील सर्वच पक्षांकडून उमेदवारांची चाचपणी सुरु झाली आहे. यामध्ये महाराष्ट्र नवनिर्माण सेनेनं बाजी मारली असून सर्वात आधी आपला विधानसभेचा पहिला उमेदवार जाहीर केला आहे. हे जाहीर करताना मनसे महायुतीतून बाहेर पडल्याचं चित्र दिसत आहे. (Vidhan Sabha Election 2024 MNS first candidate annnounded Sandip Rane Mira Bhayander Constituency by Avinash Jadhav)

मनसे अध्यक्ष राज ठाकरे यांचा वाढदिवस मीरारोड भागात स्थानिक मनसेच्या कार्यकर्ते आणि पदाधिकाऱ्यांकडून साजरा करण्यात आला. यावेळी मनसे नेते अविनाश जाधव यांनी मिरा भाईंदर विधानसभा मतदारसंघातील उमेदवारी थेट घोषणाच केली. महायुतीला पाठिंबा देणाऱ्या मनसेने थेट उमेदवारच जाहीर केल्यानं खळबळ उडाली आहे. जाधव यांनी केलेल्या या घोषणेमुळं मनसेचा एकेला चलोचा नारा तर नाही ना? असा प्रश्न उपस्थित होत आहे.

या कार्यक्रमात बोलताना अविनाश जाधव म्हणाले, "संदीप राणे यांच्यामध्ये एक वेगळीच ऊर्जा आपल्या सर्वांना पहायला मिळाली आहे. त्यामुळं आम्हाला पूर्णपणे खात्री आहे की संदीप ज्या पद्धतीनं काम करतोय त्यामुळं १४५ मीरा-भाईंदर या विधानसभा मतदारसंघातून महाराष्ट्र नवनिर्माण सेनेचा तो उमेदवार असेल. अभिजीत पानसे, राजू पाटील आणि मी आम्ही संदीप राणेंसाठी ही जागा नक्कीच घेऊन येऊ. संदीप आमदार झाले पाहिजेत ही सर्वस्वी जबाबदारी आपल्या सर्वांची आहे," असं आवाहनही यावेळी अविनाश जाधव यांनी उपस्थित कार्यकर्त्यांना केलं.

दरम्यान, मनसे अध्यक्ष राज ठाकरे जुलैमध्ये महाराष्ट्र दौरा करणार आहेत. या दौऱ्यामध्ये ते उर्वरित जागांसाठी सक्षम उमेदवारांची चाचपणी करणार आहेत. त्यानंतर उमेदवारांची नावं जाहीर होण्याची प्रक्रिया सुरु होईल. पण राज ठाकरेंनी उमेदवारी जाहीर करण्यापूर्वीच अविनाश जाधवांनी अभिजीत पानसे यांच्या साक्षीनं पहिला उमेदवार जाहीर केल्यानं आश्चर्यही व्यक्त केलं जात आहे.