मुंबई : पश्‍चिम रेल्वेवर अंधेरी ते चर्चगेट स्थानकादरम्यान वातानुकूलित (एसी) लोकलच्या फेऱ्यांत वाढ होणार आहे. सकाळी आणि संध्याकाळी गर्दीच्या वेळेत या फेऱ्या वाढणार असल्याने या मार्गावरील प्रवाशांना मोठा दिलासा मिळणार आहे. 25 डिसेंबर 2017 पासून पश्‍चिम रेल्वेवर एसी लोकल धावत आहेत.

सध्या एसी लोकलच्या 6 फेऱ्या चालविण्यात येत असून त्यापैकी सकाळी आणि संध्याकाळी प्रत्येकी एक फेरी तर उर्वरित फेऱ्या दुपारच्या वेळेत घेण्यात येतात. दरम्यान दिवसेंदिवस एसी लोकलने प्रवास करणाऱ्या प्रवाशांच्या संख्येत भर पडली असल्याने एसी लोकलच्या फेऱ्यांत वाढ करण्यात येणार आहे. त्यामुळे एक अधिक लोकल पश्‍चिम रेल्वेवर दाखल झाली असून या लोकलच्या मदतीने अतिरिक्त 6 फेऱ्या करण्याचा विचार पश्‍चिम रेल्वे करीत आहे. या नवीन एसी लोकलने आता पश्‍चिम रेल्वेवर एसी लोकलची संख्या 4 झाली आहे. 

साध्या लोकल प्रवाशांचा केला सर्व्हे 

एसी लोकलच्या फेऱ्या वाढवण्यासाठी पूर्वीच्या सामान्य लोकलच्या फेऱ्या रद्द कराव्या लागणार असल्याने साध्या लोकलच्या प्रवाशांची मते जाणून घेण्यासाठी एक सर्व्हे करण्यात आला. त्यामध्ये चर्चगेट ते वांद्रा स्थानंकादरम्यान धावणाऱ्या साध्या लोकलला प्रवाशांची संख्या अत्यंत कमी असल्याचे निदर्शनास आले आहे. त्यामुळे या लोकलच्या जागी एसी लोकल चालवण्याचा विचार पश्‍चिम रेल्व ेकरीत आहे. त्यानुसार सकाळी विरार ते चर्चगेट दरम्यान तीन फेऱ्या आणि तीन फेऱ्या अंधेरी ते चर्चगेट दरम्यान दुपारी 1 ते 4 वाजेपर्यंत करण्यात येणार आहेत. त्यामुळे एसी लोकलच्या अतिरिक्त 6 फेऱ्या होणार आहेत.  

web title : Western Railway's AC local trips increased