दहिसर : कोरोना विषाणूचा वाढता प्रादुर्भाव रोखण्यासाठी देशात १४ एप्रिल पर्यंत लॅाक डाऊन जाहीर करण्यात आला आहे. मात्र बोरिवली पूर्वेकडील फळ बाजार मात्र अनधिकृतपणे सुरू असल्याचे चित्र दिसत आहे. 

बोरिवली पूर्व राजेंद्र नगर उड्डाणपुलाखाली गावकर हॉल शेजारी हा अनधिकृत फळबाजार पहाटे भरवला जातो. यावेळी  मोठ्या संख्येने ट्रक, टेम्पो, रिक्षांची याठिकाणी गर्दी होते. गेली अनेक वर्ष उड्डाणपुलाखाली हा अनधिकृत फळबाजार भरवला जात आहे. विशेष म्हणजे संबंधित प्रभागाच्या सहाय्यक आयुक्त देखिल या परिसरात राहतात. अनधिकृत फळबाजारा बद्दल अनेकांनी वारंवार तक्रारी केल्या आहेत. मात्र राजकीय संरक्षण असल्याने त्याकडे पालिकेचे संबंधित अधिकारी कानाडोळा करत असल्याचा आरोप केला जात आहे. दरम्यान बोरिवली पश्चिमेकडील पश्चिमेकडील फेरीवाल्यांबाबत बातमी प्रकाशित होताच तेथील बाजार बंद करण्यात आला आहे.

मुंबईतील महत्वाच्या बातम्या वाचण्यासाठी येथे क्लिक करा

मात्र उड्डाणपुलाखाली बेकायदेशीर बसणाऱ्या व्यापाऱ्यांनी फळ विक्री सुरू ठेऊन नियम धाब्यावर बसवले आहेत. यामुळे परिसरात वाहतूक कोंडी होत आहे. सकाळी याठिकाणी फळे घेण्यासाठी येणाऱ्या नागरिकांची मोठी गर्दी होते. दहिसर ते मालाड परिसरातील अनेकजण याठिकाणी सकाळच्या वेळेस फळे घेण्यासाठी येतात. या ठिकाणी असलेले विक्रेते मास्क, ग्लोज न लावता बिनधास्त परिसरात वावरत असल्याचे दिसून येते. पालिकेचे अधिकारी या फळबाजाराकडे कानाडोळा करत असल्याचा आरोप स्थानिक रहिवासी करत आहेत.