मुंबई : पुढील दहा वर्षे ओटीटी प्लॅटफॉर्मची आहेत. चित्रपटगृहे सुरू झाली असली, तरी ओटीटीवरील प्रेक्षकसंख्या वाढत जाणार आहे. त्यामुळे ओटीटीच्या माध्यमातून मराठी मनोरंजनाचे सर्व ‘प्लॅनेट’च आम्हाला काबीज करायचे आहे, अशी महत्त्वाकांक्षा मराठीतील पहिले ओटीटी प्लॅटफॉर्म ‘प्लॅनेट मराठी’चे संस्थापक अक्षय बर्दापूरकर यांनी ‘कॉफी विथ सकाळ’मध्ये व्यक्त केली. त्यांच्यासोबत ‘अनुराधा’चे दिग्दर्शक संजय जाधव व अभिनेत्री तेजस्विनी पंडित यांनीही ओटीटीबाबत मनमोकळ्या गप्पा मारल्या.

सुरुवातीला केवळ मराठी चित्रपटांच्या प्रमोशनसाठी सुरू केलेल्या या प्लॅटफॉर्मचा ‘अनुराधा’ या वेबसीरिजपर्यंतचा रंजक प्रवास बर्दापूरकर यांनी उलगडून दाखवला. ‘प्लॅनेट मराठी’नंतर आता आम्ही ‘प्लॅनेट रंगमंच’ही लाँच करीत आहोत. याशिवाय ‘प्लॅनेट टॅलेंट’ही सुरू केल्याचे अक्षय बर्दापूरकर यांनी सांगितले.

‘अनुराधा’चे दिग्दर्शक संजय जाधव म्हणाले, की कथानकाची गरज म्हणून बोल्ड दृश्ये किंवा भाषा वापरावी लागते.