डोंबिवली - बिटकाॅईनमध्ये गुंतवणूक केल्यास जास्त परतावा मिळेल असे लालच दाखवत 10 जणांची तब्बल 6 लाख 54 हजार रुपयांची फसवणूक झाल्याची घटना उघडकीस आली आहे. यामध्ये डोंबिवली मधील एका महिलेचा देखील समावेश आहे.

गेल्या महिन्याच्या कालावधीत ऑनलाइन माध्यमातून हा फसवणुकीचा प्रकार घडला. डोंबिवली मधील नूतन यांच्या तक्रारीवरुन मानपाडा पोलिसांनी भुरट्या विरुध्द माहिती तंत्रज्ञान कायद्याने गुन्हा दाखल केला आहे.

या संदर्भात पोलिसांनी सांगितले की, ऑनलाईनच्या माध्यमातून एका भुरट्याने ऑलीव्हा 43 या इन्स्टाग्रामच्या माध्यमातून तक्रारदार नूतन यांच्याशी संपर्क साधला. बिटकाॅईनमध्ये गुंतवणूक केल्यास तुम्हाला अल्पावधीत भरपूर परतावा मिळेल असे सांगितले.

अशाप्रकारची माहिती भुरट्याने इतर 10 जणांना दिली. अल्पावधीत अधिकची रक्कम गुंतवणुकीवर मिळणार असल्याने 11 गुंतवणूकदारांनी भुरट्याच्या बोलण्यावर विश्वास ठेऊन जून, जुलै महिन्याच्या कालावधीत ऑनलाईन माध्यमातून गुंतवणूक केली.

फसवणूक झालेल्या नतून सावंत यांनी आपल्या बँक खात्यामधून 6 लाख 54 हजार रुपयांची रक्कम भुरट्याने दिलेल्या बँक खात्यात वळती केली. दोन महिने होत आले तरी आकर्षक परतावा मिळत नाही म्हणून तो मिळण्यासाठी गुंतवणूकदारांनी बुट्याच्या मागे तगादा लावला.

त्याने टाळाटाळ सुूरू केली. आकर्षक परतावा नसेल तर किमान आमची मूळ किमत परत करा, अशी मागणी गुंतवणूकदारांनी सुरू केली. त्यालाही बुट्याने प्रतिसाद देणे बंद केले. आपली फसवणूक झाल्याचे निदर्शनास आल्यावर गुंतवणूकदारांनी मानपाडा पोलीस ठाण्यात धाव घेऊन तक्रार दाखल केली. या प्रकरणी पोलिस आरोपीचा शोध घेत आहेत.