डोंबिवलीत एक धक्कादायक घटना घडली आहे.  मित्रांसोबत मस्करी करताना एका महिलेचा तिसऱ्या मजल्यावरून पडून मृत्यू झाला. ही घटना डोंबिवली कल्याण शीळ रोड वर घडली आहे. मृत महिला नगीनादेवी मंजिराम असे तिचे नाव असून, ती त्या इमारतीमध्ये सफाईचे काम करत होती. ती पिसवली टाटा नाका परिसरात आपल्या कुटुंबासह राहत होती. मानपाडा पोलिसांनी या प्रकरणी नोंद घेतली असून पुढील तपास सुरू केला आहे.

घटना कशी घडली?

डोंबिवली पूर्व कल्याण शीळ रोड वरील विकास नाका परिसरात ग्लोब स्टेट नावाची इमारत आहे. या इमारतीमधील एका कार्यालयात नगीनादेवी मंजिराम ही महिला साफसफाईचे काम करत होती. नगीनादेवी डोंबिवली पूर्वेतील पिसवली परिसरात राहते. तिला एक मुलगा आणि एक मुलगी आहेत.

आज दुपारच्या सुमारास नगीनादेवी तिच्या सहकाऱ्यांसोबत इमारतीच्या तिसऱ्या मजल्यावर जिन्याजवळ बसली होती. ती बसलेली असताना तिचा सहकारी तिच्यासोबत मस्करी करीत होता. याच दरम्यान तिच्या सहकाऱ्याचा तिला हात लागला व नगीनादेवीचा तोल गेल्याने ती क्षणार्धात तिसऱ्या मजल्यावरून खाली पडली.

पोलिसांचा तपास-

या घटनेनंतर नगीनादेवीच्या सहकाऱ्यांचा बंटी नावाचा तरुणाचाही तोल गेला. मात्र त्याला आजूबाजूला उभे असलेल्या लोकांनी वाचविले. या घटनेची माहिती मिळताच मानपाडा पोलीस घटनास्थळी दाखल झाले. त्यांनी या प्रकरणाची नोंद घेतली असून पुढील तपास सुरू केला आहे. मानपाडा पोलिसांनी या घटनेबाबत सखोल तपास सुरू केला असून, पुढील कारवाईसाठी आवश्यक माहिती गोळा केली जात आहे.