महाराष्ट्र नवनिर्माण सेनेचे अध्यक्ष राज ठाकरे यांच्यावर टीका करताना आक्षेपार्ह शब्द वापरल्याच्या रागातून वसईत मनसैनिकांनी एकाला चोप दिला आहे. मनसे कार्यकर्त्यांनी या कार्यकर्त्याला जोरदार मारहाण केल्याचं समजतंय. फक्त मारहाण करून न थांबता मनसैनिकांनी त्या तरुणाची धिंडही काढल्याचं समजतंय. यावेळी कार्यकर्त्याचे कपडेही फाडून टाकण्यात आल्याचं व्हिडिओमधून दिसतंय.

याबाबत सविस्तर वृत्त असं की, कल्याणला राहणारी निशा जोशी या महिलेने "एम्पॉवर एचआर सर्व्हिस" या कंपनीची जाहिरात पाहून लिखाण काम करण्याचा प्रोजेक्ट घेतला होता. तो प्रोजेक्ट पूर्ण करून दिल्यानंतर, कंपनीने प्रोजेक्ट मध्ये चुका काढून, पैसे देण्यास टाळाटाळ केली. महिलेने फोन वरून विशाल देवरुखकर याच्याशी संपर्क साधला विशालने महिलेशी असभ्य भाषेत बोलून, मनसे अध्यक्ष राज ठाकरे यांच्या बद्दल ही आक्षेपार्ह वक्तव्य केलं होतं असा आरोप केला जात आहे.

आक्षेपार्ह वक्तव्याची मोबाईल ऑडीओ क्लिप व्हायरल झाल्यावर विशाल देवरुखकर यास शोधून वसईच्या कार्यालयाजवळ आणून मनसे पदाधिकऱ्यांनी त्याला पकडून चोप देत पोलिसांच्या हवाली केला. माणिकपूर पोलिसांनी याबाबत तक्रार दाखल केली असून पुढील तपास सुरू आहे.