डोंबिवली - नशा करण्यासाठी पैसे हवे म्हणून तो घरातल्यांशी भांडण करत होता. शेजारी राहणारा तरुण शेजारधर्म म्हणून हे भांडण सोडवायला गेला. याचा राग आल्याने नशेबाज तरुणाने त्याच्या कानाचा लचकाच तोडल्याची घटना कल्याण पश्चिम परिसरात घडली आहे. याप्रकरणी बाजारपेठ पोलिसांनी जिम खान याला अटक केली आहे.

कल्याण पश्चिमेतील डॉ. बाबासाहेब आंबेडकर रोडला असलेल्या मोहल्ल्यात अजीम खान हा तरुण राहतो. तो नशेखोर आहे. नशा करण्यासाठी तो घरच्यांकडे वारंवार पैसे मागत असतो. पैसे न दिल्यास भांडतो. नशेसाठी त्याने घरातील वस्तू देखील विकल्या आहेत. शुक्रवारी त्याने परत नशा करण्यासाठी पैसे हवेत म्हणून घरात भांडण सुरु केले.

जोरजोरात आवाज येत असल्याने अजीमचा भाऊ आणि शेजारी राहणारा त्याचा मित्र अख्तर घरात गेले. त्या दोघांनी अजीम याला पकडून वाद मिटविण्याचा प्रयत्न केला. मात्र संतापलेल्या अजीम याने जोरदार चावा घेत अख्तरच्या कानाचा लचका तोडला. त्यानंतर नशेखोर अजीमने तेथून पळ काढला. या घटनेनंतर कल्याणच्या बाजारपेठ पोलिस ठाण्यात तक्रार करण्यात आली. पोलिसांनी गुन्हा नोंदवून अजीमला शोधून अटक केली. या प्रकरणाचा तपास पोलिस अधिकारी सुजित मुंडे करत आहेत.