नांदेड : खरीप हंगाम सन २०२० - २१ साठी पीककर्ज घेण्यास इच्छुक असलेल्या शेतकऱ्यांनी संकेतस्थळाला भेट देऊन पीककर्जाची मागणी नोंदणी करण्याचे आवाहन जिल्हाधिकारी डॉ. विपीन यांनी केले होते. यानुसार चार दिवसांत जिल्ह्यातील ३८ हजार ५४ शेतकऱ्यांनी ऑनलाइन अर्ज सादर केल्याची माहिती जिल्हा उपनिबंधक कार्यालयाकडून मिळाली.

कोरोनामुळे ऑनलाइन अर्जाची मागणी
जागतिक महामारी कोविड-१९ विषाणू संसर्गाच्या पार्श्वभूमीवर शासनाकडून देशपातळीवर संचारबंदी घोषित करण्यात आली आहे. बँकेतील गर्दीमुळे होणारा विषाणू संसर्ग टाळण्यासाठी २०२० - २१ या खरीप हंगामात नांदेड जिल्ह्यातील पीककर्ज घेण्यास इच्छुक शेतकऱ्यांनी संकेतस्थळावर (ता. १७ ते २७) मे दरम्यान ऑनलाइन पीककर्ज मागणी नोंदणी करावी, असे आवाहन शेतकऱ्यांना जिल्हाधिकारी डॉ. विपीन यांनी केले होते.

हेही वाचा...मिनी ट्रॅक्टर योजनेसाठी १५३ बचतगट पात्र

जिल्हा अग्रणी बॅंक पाठविणार अर्ज
ही नोंदणी केलेल्या शेतकऱ्यांची यादी जिल्हा अग्रणी बँकेमार्फत संबंधित बँकेकडे पाठविण्यात येणार असल्याचे त्यांनी सांगितले होते. ही यादी प्राप्त झाल्यानंतर संबंधित बँक शाखेकडून पीककर्ज घेण्यास पात्र असणाऱ्या शेतकऱ्यांना लघुसंदेश पाठविण्यात येणार आहे.

हेही वाचलेच पाहिजे.... ‘ध’ चा ‘मा’ झाल्यामुळे नांदेडकर बुचकळ्यात, जबाबदारी कोणाची?

संदेश प्राप्त होताच बॅंकेकडे जावे
बँकेमार्फत लघुसंदेश प्राप्त झालेल्या शेतकऱ्यांनी बँकेने दिलेल्या तारखेस त्यांचे आधारकार्ड, सातबारा, आठ-अ, फेरफार नक्कल, पॅनकार्ड, टोच नकाशा, पासपोर्ट साईज दोन फोटो, पासबुक या कागदपत्रांसह बँकेत उपस्थित राहावे, असे सांगण्यात आले होते. यानुसार चार दिवसांत जिल्ह्यातील ३८ हजार ५४ शेतकऱ्यांनी ऑनलाइन कर्जमागणी अर्ज दालाख केले आहेत. अंतिम पीककर्ज मंजुरी किंवा नामंजुरी बँकेच्या नियमाप्रमाणे करण्यात येईल, याची संबंधित शेतकऱ्यांनी नोंद घ्यावी, असे आवाहन जिल्हा उपनिबंधक (सहकारी संस्था) प्रवीण फडणीस यांनी केले आहे.

दोन हजार ५३९ कोटींचे पीककर्ज वाटपाचे उद्दिष्ट 
जिल्हास्तरीय बॅंकर्स समितीच्या बैठकीत जिल्हाधिकारी डॉ. विपीन यांनी आगामी खरीप हंगामात नांदेड जिल्ह्यासाठी दोन हजार ३१ कोटी, तर रब्बीसाठी ५०७ कोटी, असे एकूण दोन हजार ५३९ कोटींचे पीककर्ज वाटपाचे उद्दिष्ट २८ बॅंकांच्या वेगवेगळ्या शाखांना दिले आहे. या बाबत जिल्हाधिकारी डॉ. विपीन यांनी शेतकऱ्यांना वेळेत कर्ज देण्याची सूचना दिली होती. 

कर्ज वाटपाचे काम रखडले
यंदा शेतकऱ्यांची पीककर्ज माफी कोरोना विषाणूच्या उपाययोजनेत लागू केलेल्या लॉकडाउनमध्ये अडकल्याने पीककर्ज वाटपाचे काम ठप्प आहे. पीककर्ज माफीसाठी पात्र ठरलेल्या खात्यांवर कर्जमाफीची रक्कम वर्ग झाल्यानंतर त्या खात्याला नव्याने कर्ज वापट करणे सोयीचे होईल, अशा विचारात असलेल्या राष्ट्रीयीकृत बॅंकांनी चालू बाकीदार तसेच नव्याने कर्ज घेणाऱ्या शेतकऱ्यांनाही कर्ज वाटप केले नसल्याचे स्पष्ट झाले आहे.