नांदेड : मागील अनेक वर्षांपासून बहुचर्चित व प्रस्तावित नांदेड - बिदर ब्रॉडगेज रेल्वेमार्गासाठीच्या ५० टक्के वाट्याला राज्य शासनाने सोमवारी मंजुरी दिली आहे. याबाबतचे पत्र मिळाल्याची माहिती खासदार प्रताप पाटील चिखलीकर यांनी दिली.

ग्रामीण विशेषतः अविकसित भागातील रेल्वे प्रकल्पांना गती मिळण्यासाठी निवडक प्रकल्पांत ४० ते ५० टक्के आर्थिक सहभाग देण्याचे धोरण राज्याने स्वीकारले आहे. नांदेड - बिदर या १५७.०५ किलोमीटर लांबीच्या नवीन रेल्वेमार्ग प्रकल्पाचा २०१८-१९ च्या केंद्रीय अर्थसंकल्पात समावेश झाला होता. रेल्वे विभागाच्या अहवालानुसार जमिनीची किंमत वगळून प्रकल्पाची एकूण किंमत दोन हजार १६२ कोटी रुपये आहेत.

महाराष्ट्रातील १००.७५ किलोमीटर लांबीसाठी एक हजार ३८७ कोटींचा खर्च आहे. जमीन अधिग्रहणाचा ११३ कोटी खर्च अंतर्भूत केल्यानंतर राज्याच्या प्रकल्पाची एकूण किंमत दीड हजार कोटी आहे. या अनुषंगाने केंद्राच्या एकूण प्रकल्प किमतीच्या ५० टक्के म्हणजेच ७५० कोटींच्या आर्थिक सहभागास राज्य सरकारने मान्यता दिली आहे.