नांदेड : विविध प्रलंबित मागण्यांसाठी जालना येथे उपोषणास बसलेले दीपक रणनवरे यांच्या उपोषणाला पाठिंबा देण्यासाठी सकल ब्राह्मण समाजातर्फे मंगळवारी (ता. पाच) जिल्हाधिकारी कार्यालयासमोर लाक्षणिक उपोषण करण्यात आले. आंदोलनानंतर शिष्टमंडळाच्या वतीने जिल्हाधिकारी कार्यालयात निवासी उपजिल्हाधिकारी महेश वडदकर यांना मागण्यांचे निवेदन देण्यात आले.

भगवान परशुराम आर्थिक विकास महामंडळाची स्थापना करून त्यासाठी एक हजार कोटींची तरतूद करण्यात यावी, ब्राह्मण समाजातील विद्यार्थ्यांना मोफत शिक्षण देण्यात यावे, प्रत्येक जिल्ह्यात ब्राह्मण समाजातील विद्यार्थ्यांसाठी स्वतंत्र वसतिगृह निर्माण करावे, मंदिरातील पुजारी व पुरोहितांना दरमहा पाच हजार मानधन देण्यात यावे, ब्राह्मण समाजातील सेवकांना मिळालेल्या इनामी जमिनी वर्ग दोनमधून वर्ग एकमध्ये करण्यात याव्यात, राज्यातील सर्व मंदिरे वंशपरंपरागत पुरोहितांकडे सुपूर्द करण्यात यावीत, शिष्यवृत्तीचा लाभ घेणाऱ्या व्यक्तीस पुन्हा खुल्या प्रवर्गातून संधी देऊ नये, अशा विविध मागण्या निवेदनात करण्यात आल्या.

या आंदोलनात विश्वासशास्त्री घोडजकर, प्रवीण साले, कृष्णा जोशी, आशिष नेरलकर, निखील लातूरकर, अनिल डोईफोडे, संतोष परळीकर, बंडोपंत कुंटूरकर, सखाराम कुलकर्णी, मोहिनीराज दिवाकर, शीतल खांडील, प्रदीप देशपांडे, प्रदीप भोरे, सतीश भुरे, गोविंद चौधरी, नरेश दंडवते, गिरीश कहाळेकर, मुकुंद वाकोडकर, शशिकांत पाटील, दि.मा. देशमुख, संतोष कुलकर्णी, रवींद्र कुलकर्णी, रघुनाथ सरदेशपांडे, निलेश कुंटूरकर, अपर्णा चितळे, अर्चना शर्मा, मनीषा कुणसावलीकर आदीं समाज बांधव उपस्थित होते.