नांदेड : रयत क्रांती संघटनेचे युवा प्रदेशाध्यक्ष पांडुरंग शिंदे यांच्या नेतृत्वाखाली मांजरम (ता. नायगाव) येथे गुरुवारी (ता. दहा) दुध दरवाढीच्या मागणीसाठी सरकारच्या प्रतिमात्मक पुतळ्यास शेणाने अंघोळ घालत चाबूक फोडो आंदोलन करण्यात आले. यावेळी सरकार विरोधात घोषणाबाजी करण्यात आली.

रयत क्रांती संघटनेचे नेते आमदार सदाभाऊ खोत यांच्या मार्गदर्शनाखाली संपूर्ण राज्यात दूध दर वाढीच्या मागणीसाठी चाबूक फोडो आंदोलन होत आहे. या अनुषंगाने नायगाव तालुक्यातील मांजरम येथे रयत क्रांती युवा मोर्चाचे प्रदेशाध्यक्ष पांडुरंग शिंदे यांच्या नेतृत्वाखाली आंदोलन करण्यात आले. लॉकडाऊनचा गैरफायदा घेत खाजगी दुध कंपन्या व सहकारी दूध संघांनी दूध दर विक्री प्रति लिटर १० ते १८ रुपयांनी पाडले आहेत.

हेही वाचा - कोरोनाकाळात ई-फार्मसी, ई-डायग्नोस्टिक्स आणि टेलि-कन्सल्टेशनला मोठी मागणी वाढताना दिसली

सध्या गायीच्या दुधाला दर २२ रुपये व म्हशीच्या दुधाला दर ३२ रुपये मिळतो. हा दर शेतकऱ्यांना परवडणारा नाही. खलीचा दर किलो ३० रुपये, पशु खाद्याचा दर मोठ्या प्रमाणात वाढले आहेत. अशा परिस्थिती हा दर शेतकऱ्यांना संकटात टाकणारा आहे. शुद्ध पाण्याच्या दर २० रुपये आहे. अन दुधाला प्रतिलीटर २२ रुपये. पाण्याला दुधापेक्षा जास्त महत्त्व आल्यासारखे आहे.

सरकारने उसाच्या एफआरपीनुसार दुधाला किमान आधारभूत किंमत द्यावी. गाईच्या दुधाला किमान ३० प्रती लिटर व म्हैशीच्या दुधाला किमान ६० प्रति लिटर दर द्यावे या शेतीपूरक दूध व्यवसायाला संरक्षण द्यावे, मागणी करण्यात आली. यावेळी गणेश शिंदे, सुरेश महाराज, गणेश गायकवाड, हणमंत गायकवाड, जयराज शिंदे, गोविंद गायकवाड, राजेश दरेंगाव, विनायक गायकवाड, शरद शिंदे, विश्वनाथ शिंदे इत्यादी शेतकरी उपस्थित होते.