नांदेड : माजी मुख्यमंत्री अशोक चव्हाण यांनी मंगळवारी मुंबईत भारतीय जनता पक्षात प्रवेश केल्यानंतर त्याचे पडसाद नांदेड शहर आणि जिल्ह्यात उमटले. काही पदाधिकारी, कार्यकर्त्यांनी राजीनामे देत आपण अशोक चव्हाण यांच्यासोबत असल्याचे सांगितले तर काही जण अजूनही संभ्रमावस्थेत असल्याचे चित्र आहे.

नांदेड महापालिकेतील काही मुस्लिम समाजातील माजी पदाधिकारी, नगरसेवकांनी आज मुंबई गाठून कॉँग्रेसचे प्रदेशाध्यक्ष नाना पटोले यांची भेट घेतली. आम्ही कॉँग्रेससोबतच असल्याचे त्यांनी सांगितले. दरम्यान, नवा मोंढ्यातील कॉँग्रेसच्या कार्यालयासमोर लावण्यात आलेले अशोक चव्हाण यांचे फलक काढण्यात आले. दुसरीकडे भाजपच्या पदाधिकारी, कार्यकर्त्यांनी चव्हाण यांच्या निर्णयाचे स्वागत करत महावीर चौकात जल्लोष केला.

फलक काढले, फलक लावले!

चव्हाण यांच्या समर्थकांनीही त्यांच्यासोबत असल्याचे सांगत राजीनामा दिला आहे. त्यामध्ये प्रवक्ते संतोष पांडागळे, माजी नगरसेवक श्याम दरक, महिला आघाडीच्या राज्य सरचिटणीस सुमती व्याहाळकर आदींसह अनेकांचा समावेश आहे. कॉँग्रेसच्या नवा मोंढा येथील कार्यालयात आणि समोर लावण्यात आलेले अशोक चव्हाण यांचे फलक हटविण्यात आले आहेत. दुसरीकडे नांदेड शहरात ठिकठिकाणी चव्हाण यांचे फलक लावून पाठिंबाही देण्यात आला आहे.

‘पुन्हा लीडर कसे काय झाले?’

कॉँग्रेस नेते खासदार राहुल गांधी, अध्यक्ष मल्लिकार्जुन खर्गे यांनी दिलेला ‘डरो मत’चा नारा घेऊन आगामी काळात लढणार असल्याची माहिती प्रदेश काँग्रेसचे प्रवक्ते बालाजी गाडे, सरचिटणीस ॲड. सुरेंद्र घोडजकर आदींनी आज (ता. १३) पत्रकार परिषदेत दिली. काँग्रेसचे पूर्वाश्रमीचे नेते अशोक चव्हाण यांनी काँग्रेस सोडून भाजपचे कमळ हाती घेतले आहे. त्यांच्या या निर्णयाचे दुःखच आहे. अशोक चव्हाण हे लीडर नाहीत तर डीलर आहेत, असा आरोप भाजपच्या काही नेत्यांनी यापूर्वी केला होता. आज ते लीडर कसे काय झाले, असा प्रश्नही त्यांनी उपस्थित केला. एक व्यक्ती म्हणजे पक्ष नव्हे. या पक्षात फुले-शाहू-आंबेडकर यांच्या विचारधारेवर चालणारे अनेक कार्यकर्ते आहेत. काँग्रेस पक्ष येणाऱ्या काळात निकराची लढाई लढेल. कुठला नेता पक्ष सोडून गेला म्हणजे काँग्रेसची वोटबँक कमी होणार नाही, असा विश्वासही त्यांनी व्यक्त केला.

माजी नगरसेवक प्रदेशाध्यक्षांच्या भेटीला

दरम्यान, नांदेड महापालिकेतील मुस्लिम समाजातील माजी पदाधिकारी, नगरसेवकांनी आज मुंबईत कॉँग्रेसचे प्रदेशाध्यक्ष नाना पटोले यांची भेट घेतली. त्यामध्ये माजी महापौर अब्दुल सत्तार, माजी उपमहापौर मसूद खान, शमीम अब्दुल्ला, माजी नगरसेवक तथा प्रवक्ते मुन्तजीब, माजी नगरसेवक शेर अली, अब्दुल गफूर आदींचा समावेश होता. नांदेडला लवकरच काँग्रेसचे पक्षनिरीक्षक येऊन आढावा घेतील, अशी माहिती प्रवक्ते मुन्तजीब यांनी प्रसार माध्यमांशी बोलताना दिली.