नायगाव (जि. नांदेड) : तत्कालीन पंतप्रधान राजीव गांधी यांच्या हत्येच्या आदल्या दिवशी ज्या नरसी फाट्यावर महाराष्ट्रातील शेवटची सभा झाली होती, त्याच ठिकाणी बुधवारी (ता. नऊ) सकाळी त्यांचा मुलगा, काँग्रेसचे खासदार राहुल गांधी यांनी वडिलांना आदरांजली वाहिली. या ठिकाणचे वातावरण काही काळ भावुक बनले होते. ज्येष्ठ मंडळींनी त्यावेळच्या आठवणींना उजाळा दिला. ‘भारत जोडो’ यात्रेच्या महाराष्ट्रातील तिसऱ्या दिवसाची सुरवात शंकरनगर (जि. नांदेड) येथून सकाळी साडेसहाला झाली. किनाळा, हिप्परगा या गावांत स्वागत स्वीकारत यात्रा साडेसातला नरसीमध्ये आली.

रस्त्याच्या दुतर्फा नागरिक होते. नरसी फाटा या चौकातही छोटेखानी व्यासपीठ उभे केले होते. व्यासपीठावर माजी पंतप्रधान राजीव गांधी आणि माजी मुख्यमंत्री शंकरराव चव्हाण यांची प्रतिमा ठेवण्यात आल्या होत्या. नरसी फाट्यावर राहुल गांधी पोचल्यानंतर त्यांनी दोन्ही प्रतिमांना पुष्प अर्पण केले. यावेळी काही काळ वातावरण भावुक झाले. लगेच यात्रा नायगावकडे मार्गस्थ झाली.

इंदिराजींचा नातू पहाण्याची उत्सुकता

नरसी फाट्यावरून नायगावकडे येत असताना सकाळी आठच्या दरम्यान, राहुल गांधी यांनी नुरी फंक्शन हॉलमध्ये नाश्ता केला. साडेआठला पुन्हा पदयात्रेला सुरवात केली. यावेळी काहींनी कोळी बांधवांच्या वेशात राहुल यांची भेट घेतली. दुतर्फा उभ्या असलेल्यांपैकी एका मुलाने भेटायची इच्छा व्यक्त केली. राहुल यांनी ती पूर्ण केली त्याला सोबत घेऊन विचारपूस केली. माजी पंतप्रधान इंदिरा गांधी यांचा नातू बघायला मिळावा, म्हणून अनेक ज्येष्ठ महिला पाच-सहा किलोमीटरची पायपीट करत नायगावपर्यंत आल्या होत्या.