अर्धापूर : भोकर विधानसभा मतदारसंघातील अर्धापूर, मुदखेड व भोकर या तीन तालुक्यातील विजेविषयी अडचणीं तत्काळ सोडवा, अशी तंबी माजी मुख्यमंत्री अशोक चव्हाण यांनी महावितरणच्या अधिकाऱ्यांना दिल्या आहेत.

डीपी नादुरुस्त होणे, वारंवार वीज पुरवठा खंडित होणे यांसह विविध अडचणी विषयी तत्काळ कार्यवाही करण्याचे आदेश श्री. चव्हाण यांनी अधिकाऱ्यांना देऊन चांगलेच धारेवर धरले. अर्धापूर, मुदखेड आणि भोकर या तीन तालुक्यातील गावात महावितरण कंपनीच्या कामकाजाविषयी शेतकरी, ग्राहक, उद्योजक यांच्या तक्रारी आहेत.

वारंवार वीज खंडीत होणे, नादुरुस्त डीपी चालू करण्यासाठी बराच कालावधी लगणे, विद्युत जोडणी देण्यासाठी महिने लागणे, ग्राहकांचे फोन न घेणे अशा अनेक तक्रारी आल्या आहेत. महावितरण कंपनीच्या कामकाजाला सर्वसामान्य नागरिक वैतागले आहेत. या अनागोंदी कारभारामुळे नागरिकांना मनस्तापाला सामोरे जावे लागत आहे.

त्यामुळे भोकर विधानसभा मतदारसंघातील महावितरण कंपनीचे अधिकारी व मुख्य अभियंता, अधिक्षक अभियंता, कार्यकारी अभियंता यांच्यासह प्रमुख अधिकाऱ्यांची बैठक माजी मुख्यमंत्री अशोक चव्हाण यांच्या उपस्थितीत घेण्यात आली. या बैठकीत महावितरण कंपनीचा कारभाराविषयी चर्चा झाली.

अधिकऱ्यांना चांगलेच धारेवर धरुन ग्राहकांची कामे तातडीने करण्यात यावीत, नादुरुस्त डीपी तत्काळ बदलून देण्यात यावेत, असे आदेश माजी मुख्यमंत्री चव्हाण यांनी दिले असल्याची माहिती स्थायी समितीचे सभापती किशोर स्वामी यांनी दिली.

यावेळी बाजार समितीचे सभापती संजय देशमुख लहानकर, तालुकाध्यक्ष बालाजी गव्हाणे, शहराध्यक्ष राजू शेटे, नगराध्यक्ष छत्रपती कानोडे, उपनगराध्यक्ष प्रतिनिधी मुसबीर खतीब, युवक काँग्रेसचे जिल्हाध्यक्ष पप्पु पाटील कोंढेकर, अमोल डोंगरे, बाजार समितीचे संचालक निळकंठ मदने, ज्ञानेश्वर राजेगोरे, गजानन कदम, भाऊरावचे संचालक सुभाषराव देशमुख आदी उपस्थित होते.